09.06.2026 | 23:19
Կանանց Հայաստանի հավաքականը 0:6 հաշվով պարտվեց Բելառուսին. ՏԵՍԱՆՅՈՒԹ
Դատարանը պարտավորեցրել է քրեական վարույթ նախաձեռնել Նաթան սրբազանի հեռախոսային խոսակցությունների գաղտնիության ապօրինի խախտման փաստով. փաստաբան
Քաղաքականություն
20.01.2026 | 22:37
Երևանի առաջին ատյանի ընդհանուր իրավասության քրեական դատարանը պարտավորեցրել է վարույթի հանրային մասնակցին քրեական վարույթ նախաձեռնել Նաթան արքեպիսկոպոս Հովհաննիսյանի հեռախոսային խոսակցությունների գաղտնիության հնարավոր ապօրինի խախտման առիթով։
Ինչպես հիշեցնում է փաստաբան Արա Զոհրաբյանը, 2025 թվականի հոկտեմբերի 17-ին civic.am կայքը հրապարակել էր նյութ, ըստ որի համացանցում տարածվել էր Նաթան արքեպիսկոպոս Հովհաննիսյանի և կաթողիկոսի նախկին գավազանակիր Աղան աբեղա Երնջակյանի միջև 2023 թվականի հոկտեմբերին տեղի ունեցած հեռախոսային խոսակցության ձայնագրությունը։ Նույն օրը Քննչական կոմիտեն քրեական վարույթ էր նախաձեռնել այլ հոդվածով։
2025 թվականի հոկտեմբերի 22-ին Արա Զոհրաբյանը հաղորդում էր ներկայացրել՝ պահանջելով քրեական վարույթ սկսել նաև ՀՀ քրեական օրենսգրքի 206-րդ հոդվածով՝ հեռախոսային խոսակցությունների գաղտնիությունն ապօրինի խախտելու հատկանիշներով։ Սակայն Քննչական կոմիտեն հոկտեմբերի 29-ին մերժել էր վարույթ նախաձեռնելը, իսկ 2025 թվականի նոյեմբերի 18-ին մերժումը ուժի մեջ էր թողել նաև ՀՀ գլխավոր դատախազությունը։
Փաստաբանի խոսքով՝ իրավապահ մարմինները չեն արձագանքել այն հանգամանքին, որ ձայնագրությունը, ըստ ամենայնի, կատարվել է գաղտնի՝ հատուկ տեխնիկական միջոցների կիրառմամբ, ինչպես նաև հնարավոր է՝ հետագայում մոնտաժվել կամ փոփոխվել է։
Գլխավոր դատախազության մերժումից հետո բողոք է ներկայացվել դատարան։ Դատավոր Ա․ Մելիքսեթյանի որոշմամբ բողոքը բավարարվել է, և դատարանը նշել է, որ «առերևույթ առկա են ՀՀ քրեական օրենսգրքի 206-րդ հոդվածով նախատեսված հանցանքի հատկանիշները, ուստի քննիչը պարտավոր էր քրեական վարույթ նախաձեռնել և ստուգել հաղորդման մեջ նշված փաստերը»։
