Դուգինը սպառնաց․ ՀՀ-ն վտանգի տակ է ՌԴ-ից՝ ռուսական կայսերապաշտությունը արթուն գազան է․ Լիլիթ Դալլաքյան․ ՏԵՍԱՆՅՈՒԹ

«Միտք» վերլուծական կենտրոնի ղեկավար, քաղաքագետ Լիլիթ Դալլաքյանը Factor TV-ի հետ զրույցում անդրադարձել է Կրեմլի գաղափարախոս Ալեքսանդր Դուգինի և քարոզիչ Վլադիմիր Սոլովյովի՝ Հայաստանի ինքնիշխանության դեմ ուղղված վերջին սպառնալիքներին։ Ըստ Դալլաքյանի՝ Դուգինի այն պնդումը, թե Ռուսաստանը պետք է դառնա աշխարհի երեք հզորագույն կենտրոններից մեկը և չպիտի հանդուրժի Հայաստանի կամ Վրաստանի սուվերենությունը, իրականում Մոսկվայի թուլության խոստովանությունն է։

Դալլաքյանի գնահատմամբ՝ Կրեմլի խոսափողների հայտարարությունները վկայում են այն մասին, որ Ռուսաստանը ձախողվել է Ուկրաինայում․ «Ռուսաստանը խոստովանում է, որ ռուս-ուկրաինական պատերազմում ֆիասկոյի է ենթարկվել․․․ և չի կարողանում այլևս որևէ տարածաշրջանում ցույց տալ իր ներուժը»։

Քաղաքագետը կասկածի տակ է դնում Ռուսաստանի՝ որպես համաշխարհային բևեռի հավակնությունները՝ մատնանշելով տնտեսական անդունդը․ «Ռուսաստանի տնտեսությունը 12 անգամ ավելի փոքր է, քան Եվրամիության տնտեսությունը։ Առանց տնտեսության պատերազմ անհնար է վարել»։ Նա հավելել է, որ միակ բաղադրիչը, որով Ռուսաստանը կարող է մրցակցել, միջուկային զենքն է, ինչը նրան դարձնում է ոչ թե երրորդ, այլ չորրորդ կամ հինգերորդ կենտրոնը։

Դալլաքյանը շեշտում է, որ Ռուսաստանի համար Հայաստանն ու Ղազախստանը հիմնական թիրախներն են՝ պայմանավորված «Միջին միջանցքի» գործոնով։ Նա նշում է․ «Եթե դուք կորցնում եք Ուկրաինան և ուկրաինացիները ցույց են տալիս, որ կարելի է դիմագրավել Ռուսաստանին, արդեն մյուս հանրապետությունների համար սա դառնում է օրինակ»։ Ըստ նրա՝ Ռուսաստանի թուլությունը նրան դարձնում է առավել ագրեսիվ։

Անդրադառնալով Հայաստանի ներքաղաքական իրավիճակին և Ռուսաստանի կողմից հեղաշրջման հնարավոր փորձերին՝ Դալլաքյանը նկատել է, որ Մոսկվան այս պահին այլընտրանք չունի։ «Վլադիմիր Պուտինը չի կարող փոխել Նիկոլ Փաշինյանին իր ցանկացած անձնանցով․․․ իրենց հարակից ուժերով չեն կարողանում հեռացնել»,- նշել է բանախոսը։

Ավելին, նա պնդում է, որ ՀՀ վարչապետը Կրեմլի համար դասական իմաստով հակառուս չէ․ «Նիկոլ Փաշինյանը կլասիկ իմաստով հակառուս չէ, ո՛չ Զելենսկի է, ո՛չ Մայա Սանդու է, ո՛չ Սահակաշվիլի․․․ Նիկոլ Փաշինյանը որևէ կարմիր գիծ չի խախտում Վլադիմիր Պուտինի համար։ Նա չի դուրս եկել ՀԱՊԿ-ից, չի ստորագրել համաձայնագիր ԱՄՆ-ի հետ»։ Ըստ Դալլաքյանի՝ Պուտինը գիտի, որ եթե այս ստատուս-քվոյով նախկինները վերադառնան, Փաշինյանը խնդիր չի ունենա, իսկ ժողովուրդը նախկիններին չի ընտրի։

Խոսելով տարածաշրջանային զարգացումների մասին՝ Դալլաքյանը նշել է, որ Թրամփի վարչակազմի գալով Իրանի շուրջ օղակը սեղմվում է, սակայն Իրանը հեշտ հանձնվող չէ․ «Իրանը Վենեսուելա չէ․․․ ունի պրոքսի գործիքներ»։

Հարցազրույցն ամբողջությամբ՝ տեսանյութում։

Ռոբերտ Անանյան