Եկեղեցու ղեկավարը իր ընտանիքի անդամներին է օտարել գույքեր․ Թագուհի Ղազարյան․ ՏԵՍԱՆՅՈՒԹ

Հուշարձանների պետական ցանկերում ներառված պաշտամունքային կառույցները հնարավոր կլինի ցանկացած երրորդ անձի հատուցմամբ կամ անհատույց օտարել բացառապես կառավարության համաձայնության դեպքում: Այս մասին նախագիծը Ազգային ժողովի լիագումար նիստում ներկայացնում էր նախագծի հեղինակը, Թագուհի Ղազարյանը։

«Ըստ նախագծի, կառավարությունը կարող է չտալ այդ համաձայնությունը կամ մերժել այդպիսի սեփականության փոփոխությունը, եթե առկա է տվյալ գույքը ոչ հանրօգուտ կամ ոչ իր նպատակային նշանակությամբ օգտագործելու ռիսկ, կամ գործարքի պայմանները հակասում են հանրության շահերին, կամ սահմանված ծանոթմանը կից ներկայացված փաստաթղթերը կեղծ են կամ խեղաթյուրված: Այս նախաձեռնությունը միտված է հուշարձանների պահպանության ոլորտում ավելի ամրապնդելու ինստիտուցիոնալ մեխանիզմները»,-նշեց նա։

Նրա խոսքով՝ քանի որ Հայաստանյայց Առաքելական Սուրբ Եկեղեցին ամենաշատ պատմամշակութային հուշարձաններ տիրապետող կրոնական կազմակերպությունն է, պարզ է, որ առաջին հերթին այդ ուղղությամբ են մտածել նախագիծը ներկայացնելիս։

«Այս պահի դրությամբ նրանք ավելի քան 360 եկեղեցիների և վանքերի են տիրապետում։ Սրանց մեջ ներառված նաև այն եկեղեցիները, որոնք չունեն հուշարձանի կարգավիճակ: 2010 թվականից հետո կառուցված որևէ եկեղեցի հուշարձանի կարգավիճակ չի ստացել, և ես կարծում եմ՝ սա նույնպես վերանայելու կարիք ունի:

Մասյացոտնի թեմի առաջնորդն ասաց, որ եկեղեցին, իր կազմակերպությունը, իր փաստացի ղեկավարի ընտանիքի անդամներին օտարել է գույքեր, բնակարաններ, որից հետո մամուլում տեղեկություններ հրապարակվեցին կոնկրետ հասցեներով և մարդկանց անուններով, որոնք ես այստեղ չեմ կրկնի՝ մարդկանց և նրանց հասցեները չթիրախավորելու համար: Բացի այդ, օրեր առաջ, և երևի հենց նույն օրը, երբ որ մենք քննարկում էինք այս նախագիծը, եկեղեցու ներկայացուցիչ Տեր Ասողիկ քահանան հարցազրույց տվեց այն կապակցությամբ, որ եկեղեցուն պատկանող Գեղարդից, կոթողից փշրանք է նվիրվել ռուս ուղղափառ եկեղեցու պետին։ Բառացի եմ մեջբերում, ինչ-որ մեջբերում եմ, և քահանան ասաց, որ Գարեգին Երկրորդ կաթողիկոսը իր լիակատար իրավունքով իր եկեղեցու սուրբ մասունքներից ցանկացած անձի, լինի աշխարհական, թե եկեղեցական, կարող է նվիրաբերել, դա եկեղեցու հովվապետի բացառիկ և լիակատար իրավունքն է, և որևէ մեկը այստեղ իրավունք չունի ձայն անգամ արձակելու»,-նշեց նա։

Մանրամասները՝ տեսանյութում։