02.07.2026 | 13:49
Պարզ ճակատով եմ ավարտում այս փուլը, որևէ բանի համար չեմ փոշմանում. Ալեն Սիմոնյան․ ՏԵՍԱՆՅՈՒԹ
Թրամփը հայտարարել է, որ այլևս «պարտավորված չի զգում մտածել խաղաղության մասին», քանի որ Նոբելյան մրցանակն իրեն չեն տվել. PBS
Քաղաքականություն
19.01.2026 | 16:14
ԱՄՆ նախագահ Դոնալդ Թրամփը նամակ է գրել Նորվեգիայի վարչապետ Յոնաս Գահր Ստյորեին՝ նշելով, որ այլևս «պարտավորված չի զգում բացառապես խաղաղության մասին մտածել», քանի որ Նոբելյան խաղաղության մրցանակն իրեն չի շնորհվել։ Այս մասին X-ում հայտնել է PBS-ի լրագրող Նիք Շիֆրինը, որը նամակը ստացել է ԱՄՆ պաշտոնյաների շրջանում մի քանի աղբյուրներից, գրում է The Insider-ը։
Նամակում Թրամփը նշում է, որ «այլևս պարտավորված չի զգում բացառապես խաղաղության մասին մտածել» և այժմ կարող է կենտրոնանալ «այն բանի վրա, ինչը լավն ու ճիշտն է Ամերիկայի Միացյալ Նահանգների համար»։ Նա դա բացատրում է Նորվեգիայի կողմից իրեն Նոբելյան Խաղաղության մրցանակ չշնորհելու որոշմամբ՝ «ութից ավելի պատերազմներ կանխելու համար»։
Նորվեգիայի Նոբելյան Խաղաղության մրցանակի կոմիտեն, որը պատասխանատու է խաղաղության մրցանակի շնորհման համար, հոկտեմբերին այն շնորհել էր Վենեսուելայի ընդդիմության առաջնորդ Մարիա Կորինա Մաչադոյին։
«Դանիան չի կարող պաշտպանել այս հողը [Գրենլանդիան] Ռուսաստանից կամ Չինաստանից, և ինչո՞ւ նրանք ընդհանրապես ունեն «սեփականության իրավունք»։ Գրավոր փաստաթղթեր չկան, կա միայն այն, որ հարյուրավոր տարիներ առաջ այնտեղ նավ է կանգ առել, բայց մեր նավերը նույնպես այնտեղ կանգ են առել։ Ես ՆԱՏՕ-ի համար ավելին եմ արել, քան որևէ մեկը՝ դրա հիմնադրումից ի վեր, և հիմա ՆԱՏՕ-ն պետք է ինչ-որ բան անի Միացյալ Նահանգների համար։ Աշխարհն անվտանգ չի լինի, եթե մենք չունենանք Գրենլանդիայի նկատմամբ լիակատար վերահսկողություն»,- ասվում է նամակում։
Անցյալ շաբաթ Նոբելյան Խաղաղության մրցանակի դափնեկիր Մարիա Կորինա Մաչադոն իր մրցանակը հանձնել էր ԱՄՆ նախագահին Սպիտակ տանը կայացած հանդիպման ժամանակ։
Ավելի վաղ ԱՄՆ նախագահը հայտարարել էր Դանիայի, Նորվեգիայի, Շվեդիայի, Ֆրանսիայի, Գերմանիայի, Մեծ Բրիտանիայի, Նիդերլանդների և Ֆինլանդիայի դեմ առևտրային մաքսատուրքերի սահմանման մասին՝ փետրվարի 1-ից 10% և հունիսի 1-ից՝ 25%: Այս մաքսատուրքերը, ըստ Թրամփի, ուժի մեջ կմնան՝ մինչև Միացյալ Նահանգների կողմից Գրենլանդիայի «լիակատար և ամբողջական ձեռքբերման գործարքի» կնքումը:
Իր հերթին, ԵՄ-ն քննարկում է 93 միլիարդ եվրոյի չափով պատասխան մաքսատուրքերի սահմանման հարցը։
Թարգմանությունը՝ Էմմա Չոբանյանի
