14.03.2026 | 18:24
Իրանում ՀՀ դեսպանությունը շարունակում է աշխատել ինտենսիվ ռեժիմով. ԱԳՆ
Կենսաթոշակը կվճարվի բառացապես անկանխիկ եղանակով․ նոր նախագիծ
Հասարակություն
19.01.2026 | 12:13
Ապրիլի 1-ից կենսաթոշակը վճարվելու է բառացապես անկանխիկ եղանակով, եթե աշխատանքի և սոցիալական հարցերի նախարարության մշակած նախագիծը ընդունվի գործադիրի կողմից։
Գործող կարգավորումներով կենսաթոշակը կարող է վճարվել կանխիկ եղանակով, եթե կենսաթոշակառուն (անչափահաս կամ խնամակալության տակ գտնվող կենսաթոշակառուի դեպքում` նրա օրինական ներկայացուցիչը` ծնողը, որդեգրողը կամ խնամակալը) ֆունկցիոնալության խորը կամ ծանր աստիճանի սահմանափակումով հաշմանդամություն ունեցող անձ է, կամ լրացել է կենսաթոշակառուի 75 տարին: Կենսաթոշակը լիազորագրով կամ 14 տարին լրացած անչափահասին ևս վճարվում է կանխիկ եղանակով:
Վճարման եղանակը կարող է փոխվել, եթե մինչև մարտի 31-ը համապատասխան դիմում ներկայացվի։
«2026 թվականի ապրիլ ամսվա կենսաթոշակի վճարման ցուցակը ձևավորելիս համապատասխան բնակավայրում հաշվառված՝ կենսաթոշակն կանխիկ եղանակով ստացող անձանց համար բանկի ընտրությունն իրականացնում է միասնական սոցիալական ծառայությունը՝ ծրագրային մոդուլի կիրառմամբ պատահականության սկզբունքով՝ հաշվի առնելով տվյալ բնակության վայրում այդ ամսվա կենսաթոշակի վճարման ցուցակում ներառման ենթակա՝ կենսաթոշակ ստացող անձանց թվի համամասնություններն՝ ըստ վճարող բանկերի։
Անկանխիկ եղանակով կենսաթոշակ կվճարվի նաև այն դեպքում, երբ անձի ֆունկցիոնալությունը գնահատող հանձնաժողովից ստացված` հաշմանդամություն ունեցող անձ ճանաչված լինելու վերաբերյալ տեղեկանքի հիման վրա առանց կենսաթոշակառուի գրավոր դիմումի 2026 թվականի ապրիլի 1-ին կամ դրանից հետո կենսաթոշակ ստանալու իրավունքը վերականգնվում է»,-նշվում է նախագծում։
Նախագծի ընդունման դեպքում պետական բյուջեում եկամուտները չեն փոխվի, իսկ ծախսերը կարող են կրճատվել։
Եվգենյա Համբարձումյան
