03.04.2026 | 21:15
Արագ, պարզ, հասանելի․ «ՄՈԳՈ»-ն նոր մասնաճյուղ բացեց Mega Mall-ում
Պակիստանը հայտարարել է Թուրքիայի և Սաուդյան Արաբիայի հետ պաշտպանական համագործակցության շրջանակի նախագծի քննարկման մասին
16.01.2026 | 22:13
Պակիստանը հայտարարել է, որ ամիսներ տևած բանակցություններից հետո երկիրը քննարկում է պաշտպանական համագործակցության շրջանակի նախագիծը Թուրքիայի և Սաուդյան Արաբիայի հետ, չնայած Թուրքիան հայտարարել է, որ դեռևս որևէ համաձայնագիր չի ստորագրվել, հաղորդում է Reuters-ը, որին վկայակոչում է Turkish Minute-ը։
Պակիստանի պաշտպանական արտադրության նախարար Ռազա Հայաթ Հարաջն ասել է, որ երեք երկրների միջև առաջարկվող եռակողմ համաձայնագիրը քննարկվում է մոտ 10 ամիս՝ հավելելով, որ նախագծի տեքստը տրամադրվել է բոլոր կողմերին և մնում է քննարկման փուլում։ Նա նշել է, որ առաջարկվող շրջանակն առանձին է Պակիստանի և Սաուդյան Արաբիայի միջև անցյալ տարի հայտարարված երկկողմ պաշտպանական համաձայնագրից և առաջ շարժվելու համար անհրաժեշտ է երեք երկրների միջև լիակատար համաձայնությունը։
Թուրքիայի արտաքին գործերի նախարար Հաքան Ֆիդանը հինգշաբթի հաստատել է, որ քննարկումներ են տեղի ունեցել, սակայն ասել է, որ որևէ պաշտոնական համաձայնագիր չի կնքվել։ Ստամբուլում կայացած մամուլի ասուլիսում Ֆիդանն ընդգծել է վստահության վրա հիմնված ավելի լայն տարածաշրջանային համագործակցության անհրաժեշտությունը՝ անկայունության և անվտանգության մարտահրավերները հաղթահարելու համար։
«Այս ամենի վերջում մենք ունենք այսպիսի առաջարկ. բոլոր տարածաշրջանային երկրները պետք է միավորվեն՝ անվտանգության հարցի շուրջ համագործակցության հարթակ ստեղծելու համար։ Այս պահին հանդիպումներ և բանակցություններ են ընթանում, բայց մենք որևէ համաձայնագիր չենք ստորագրել»,- ասել է Ֆիդանը։
Նա նշել է, որ նախագահ Ռեջեփ Թայիփ Էրդողանը կողմ է տարածաշրջանում համագործակցության և կայունության բարձրացմանը ուղղված լայն շրջանակի ստեղծմանը։
Ֆիդանն ուղղակիորեն չի նշել Պակիստանի կամ Սաուդյան Արաբիայի անունները։
Թարգմանությունը՝ Էմմա Չոբանյանի
