Ուկրաինայում էլեկտրակայաններ չեն մնացել, որոնք չեն ենթարկվել ՌԴ-ի կողմից հարվածների․ Շմիգալ

Ուկրաինայում չի մնացել ոչ մի էլեկտրակայան, որը պատերազմի ընթացքում հարվածի չի ենթարկվել ռուսների կողմից։ ՌԲԿ Ուկրաինայի հաղորդմամբ՝ այս մասին հայտարարել է Ուկրաինայի փոխվարչապետ և էներգետիկայի նախարար Դենիս Շմիգալը։

Նա նշել է, որ Ռուսաստանն իր ամբողջ զինանոցն օգտագործում է կրիտիկական ենթակառուցվածքների դեմ՝ բալիստիկ հրթիռներ, թևավոր հրթիռներ և արդիականացված անօդաչու թռչող սարքեր։ Անցյալ տարի իրականացվել է 612 թիրախային համակցված հարձակում էներգետիկ օբյեկտների վրա։ Այժմ ինտենսիվությունը միայն աճում է, հարվածները տեղի են ունենում ամեն օր։ Շմիգալն ընդգծել է, որ Ուկրաինայում չկա որևէ էլեկտրակայան, որը պատերազմի ընթացքում թշնամու հարվածներին չի ենթարկվել։

«Աշխարհում ոչ ոք երբեք նման մարտահրավերի չի բախվել։ Այս ամենի հետ մեկտեղ, մեր էներգետիկ համակարգը մնում է անվնաս, և «Ուկրէներգո»-ի դիսպետչերները վերահսկում են այն, չնայած նրանք ստիպված են կիրառել սպառման զգալի սահմանափակումներ»,- ասել է նա։

Իրավիճակն այժմ ամենածանրն է Կիևում և Կիևի մարզում, ինչպես նաև Օդեսայի, Դնեպրոպետրովսկի և Խարկովի մարզերում ու առաջնագծի բոլոր համայնքներում։ Սահմանափակումներ են գործում ամբողջ երկրում՝ թե՛ տնային տնտեսությունների, թե՛ արդյունաբերության և բիզնեսի համար։

«Իրավիճակը չափազանց բարդ է։ Որոշ քաղաքներում և շրջաններում նախապատրաստական ​​աշխատանքները ձախողվել են։ Վերջին երկու օրերի ընթացքում, անկեղծ ասած, ես տեսել եմ չափազանց շատ բաներ կանգ են առնում։ Հիմա մենք արագ կվերականգնենք կարգուկանոնը և կարագացնենք գործընթացները»,- հավելել է  Շմիգալը։

Նշենք, որ ռուսական կողմը վերջերս երկու զանգվածային հարված են հասցրել Ուկրաինայի էներգետիկ օբյեկտներին։ Այս հարձակումների հետևանքով Կիևը զգալի խնդիրներ ունի էլեկտրաէներգիայի և ջեռուցման հետ կապված։ Էլեկտրաէներգիայի արտակարգ անջատումներ են մտցվել։ Այսօր ռուսական զորքերը շարունակել են հարվածները Ուկրաինայի էներգետիկ օբյեկտներին։

Էներգետիկայի նախարարության տվյալներով՝ էլեկտրաէներգիայի անջատումներ են Զապորոժիեի և Խարկովի մարզերում։

Թարգմանությունը՝ Էմմա Չոբանյանի