Տիմոշենկոն հայտարարել է, որ իր հաշիվներն արգելափակվել են և չի կարողանա գրավ վճարել

Ուկրաինայի նախկին վարչապետ, «Բատկիվշչինա» կուսակցության առաջնորդ Յուլիա Տիմոշենկոն հայտարարել է, որ իր հաշիվներն արգելափակվել են՝ մինչև դատարանը որոշում կայացնի իր խափանման միջոցի վերաբերյալ, գրում է Current time-ը։

«Ի՞նչն է սյուրռեալիստական։ Դա այն է, երբ դուք ծրագրում եք գրավ վճարել ակնհայտորեն կեղծված քաղաքական գործի համար՝ օգտագործելով ինչ-որ անհեռատես «դիկտատորի» քաղաքական հետապնդման համար որպես փոխհատուցում ստացված գումարը։ Բայց դուք չեք կարող դա անել, որովհետև ձեր հաշիվները սառեցվել են դեռևս դատարանի որոշումից առաջ»,- գրել է նա։

Հունվարի 16-ին Բարձրագույն հակակոռուպցիոն դատարանը որոշում կկայացնի քաղաքական գործչի նկատմամբ խափանման միջոցի վերաբերյալ՝ պաշտոնատար անձին անօրինական օգուտ առաջարկելու կամ տրամադրելու դեպքով (Քրեական օրենսգրքի 369-րդ հոդվածի 4-րդ մասը):

Կոռուպցիայի դեմ պայքարի հատուկ մասնագիտացված դատախազության դատախազ Վիտալի Գրեչիշկինը հաստատել է, որ մեղադրական  կողմը կպահանջի 50 միլիոն գրիվնայի (1,1 միլիոն դոլար) չափով գրավ և կսահմանի ընթացակարգային պարտավորություններ:

Տիմոշենկոյին կասկածում են այլ խմբակցությունների մի քանի պատգամավորների «անօրինական արտոնություններ» առաջարկելու մեջ՝ որոշակի օրինագծերի օգտին կամ դեմ քվեարկելու դիմաց։ Նրա ղեկավարած կուսակցության գրասենյակում խուզարկություն է անցկացվել։ Լրագրողների հարցին՝ արդյո՞ք նա իսկապես գումար է առաջարկել պատգամավորներին, Տիմոշենկոն պատասխանել է, որ «երբեք նման զրույց չի եղել»։

Երբ նրան մատնանշել են, որ Ուկրաինայի ազգային հակակոռուպցիոն բյուրոյի (NABU) կողմից հրապարակված ձայնագրությունները պարունակում են «մեծամասնությանը ոչնչացնելու» ցանկության մասին արտահայտություն, Տիմոշենկոն հերքել է. «Ես ձեզ ասում եմ, որ այդ զրույցը գոյություն չունի։ Եվ ես հույս ունեմ, որ այսօր մեզ կտրամադրվեն այս նյութերը՝ բնօրինակը՝ ուսումնասիրության համար։ Եվ մենք կանցկացնենք անկախ փորձաքննություն, որը կտա բոլոր պատասխանները։ Սա լիովին կազմակերպված քաղաքական հնարք է»։

Թարգմանությունը՝ Էմմա Չոբանյանի