Տիմոշենկոյին մեղադրանք է առաջադրվել պատգամավորներին կաշառելու փորձի գործով

Ուկրաինայի «Բատկիվշչինա» կուսակցության առաջնորդ Յուլիա Տիմոշենկոյին կասկածի մասին ծանուցում են հանձնել մի քանի պատգամավորների կաշառելու փորձի համար։ Նրան մեղադրանք է առաջադրվել, գրում է BBC-ի ռուսական ծառայությունը։

«Տիմոշենկոյին կասկածի ծանուցում են հանձնել։ Դասակարգումը՝ 369-րդ հոդվածի 4-րդ մաս»,- հայտնել է Ուկրաինայի Մասնագիտացված հակակոռուպցիոն դատախազությունը։

Ուկրաինայի Ազգային հակակոռուպցիոն բյուրոն (NABU) և Մասնագիտացված հակակոռուպցիոն դատախազությունը (SAPO) հայտարարել էին, որ Գերագույն ռադայի խմբակցություններից մեկի ղեկավարին կասկածում են կոռուպցիայի մեջ։

Հունվարի 14-ի առավոտյան Տիմոշենկոն հաստատել է, որ «Բատկիվշչինա» կուսակցության գրասենյակում խուզարկություններ են իրականացվել, նաև հերքել է «բոլոր անհեթեթ մեղադրանքները»։

«Նրանք ոչինչ չեն գտել, ուստի պարզապես վերցրել են իմ աշխատանքային հեռախոսները, խորհրդարանական փաստաթղթերը և անձնական խնայողությունները, որոնք ամբողջությամբ ներկայացված են իմ պաշտոնական հայտարարագրում։ Ես կտրականապես մերժում եմ բոլոր անհեթեթ մեղադրանքները։ Թվում է, թե ընտրությունները շատ ավելի մոտ են, քան մենք կարծում էինք։ Եվ ինչ-որ մեկը որոշել է սկսել մրցակիցների մաքրում։ Սա իմ դեմ ուղղված առաջին քաղաքական պատվերը չէ։ Հետապնդումներն ու ահաբեկչությունը իմ առօրյան են եղել երկար տարիներ։ Ես վաղուց ոչնչից չեմ վախենում, որովհետև գիտեմ, որ ազնիվ եմ ինքս ինձ հետ, ժողովրդի հետ և Ուկրաինայի հետ»,- գրել է Տիմոշենկոն Ֆեյսբուքում։

Թարգմանությունը՝ Էմմա Չոբանյանի