Ուկրաինայի հակակոռուպցիոն մարմինները Ռադայի պատգամավորներից մեկին կոռուպցիայի մեջ են կասկածում. ենթադրաբար, խոսքը Յուլիա Տիմոշենկոյի մասին է

Ուկրաինայի Ազգային հակակոռուպցիոն բյուրոն (NABU) և Մասնագիտացված հակակոռուպցիոն դատախազությունը (SAPO) հայտարարել են, որ Գերագույն  ռադայի խմբակցություններից մեկի ղեկավարին կասկածում են կոռուպցիայի մեջ, գրում է Current time-ը։

Խմբակցության ղեկավարի գործողությունները նախապես դասակարգվում են Քրեական օրենսգրքի 369-րդ հոդվածի 4-րդ մասով (պաշտոնատար անձին անօրինական օգուտ առաջարկելը, խոստանալը կամ տրամադրելը): Ենթադրվում է, որ այս գործողությունները ներառում են այլ խմբակցությունների մի քանի պատգամավորների անօրինական օգուտներ առաջարկելը՝ որոշակի օրինագծերի «կողմ» կամ «դեմ» քվեարկելու դիմաց:

Խմբակցության ղեկավարի անունը չեն հրապարակվել: «Ազատություն» ռադիոկայանի ուկրաինական ծառայության «Սխեմաներ» նախագծի աղբյուրը նշել է, որ խոսքը Յուլիա Տիմոշենկոյի մասին է, որը ղեկավարում է «Բատկիվշչինա» խմբակցությունը: «Ուկրաինսկա պրավդան» ևս հայտնել է, որ խուզարկություն է իրականացվել Կիևի Տուրովսկա փողոցում գտնվող «Բատկիվշչինայի» գրասենյակում:

Տիմոշենկոն և «Բատկիվշչինա» կուսակցությունը դեռևս չեն մեկնաբանել այս տեղեկությունը:

2025 թվականի դեկտեմբերի վերջին NABU-ն և SAPO-ն հայտնել էին, որ բացահայտել են կազմակերպված հանցավոր խումբ, որում ներառված են Ուկրաինայի գործող պատգամավորներ, որոնք «համակարգված կերպով անօրինական օգուտներ են ստացել Ուկրաինայի Գերագույն ռադայում քվեարկելու համար»։

Նշվում է, որ գումարի չափը որոշվել է «քվեարկության արդյունավետության ցուցանիշով» և տատանվել 2000-ից մինչև 20,000 դոլարի սահմաններում: Գործով ներգրավված են հինգ պատգամավորներ. նրանց տեղեկացվել է պաշտոնատար անձի կողմից անօրինական շահույթ ստանալու կասկածի մասին։

«Зеркало недели»-ն այն ժամանակ հաղորդել էր, որ NABU-ի հաջորդ գործերը կվերաբերեն, մասնավորապես, «Ժողովրդի ծառա» կուսակցության պատգամավոր Յուրի Կիսիլին, որը Գերագույն ռադայի տրանսպորտի և ենթակառուցվածքների հանձնաժողովի նախագահն է։

Թարգմանությունը՝ Էմմա Չոբանյանի