Ավելի հավանական է՝ Արթուր Ալեքսանյանին փոխարինեմ որևի մրցումում, քան ԲԴԽ-ն վերականգնի ինձ պաշտոնում. Դավիթ Հարությունյան. ՏԵՍԱՆՅՈՒԹ

Ավելի հավանական է՝ Արթուր Ալեքսանյանին փոխարինեմ որևի մրցումում, քան ԲԴԽ-ն վերականգնի ինձ պաշտոնում։ Այս մասին լրագրողների հետ զրույցում ասել է դատավոր Դավիթ Հարությունյանը։

Բարձրագույն դատական խորհրդում շարունակվում է Երևանի քրեական դատարանի դատավոր Դավիթ Հարությունյանի կարգապահական գործի քննությունը: Այս գործը ԲԴԽ-ում դռնփակ քննվել է ավելի քան երկու տարի առաջ՝ 2023-ի ամռանը։ ԲԴԽ-ն նիստի ընթացքում Հարությունյանին հեռացրել է դահլիճից և առանց դատավորին լսելու, փաստաբանների բացակայության պայմաններում, որոշել դադարեցնել նրա լիազորությունները։

Այս որոշումից հետո Սահմանադրական դատարանը, քննելով դատավորի դիմումը, արձանագրել է, որ հրապարակայնության սկզբունքին, դատական սանկցիա կիրառելուն վերաբերող նորմերը ԲԴԽ-ն Հարությունյանի նկատմամբ այլ մեկնաբանությամբ է կիրառել, գործը ենթակա է վերանայման։ Ըստ էության՝ այսպիսով խախտվել է հրապարակայնության սկզբունքն ու դատավորի լսված լինելու իրավունքը։ Դատավորը ՍԴ որոշումից հետո դիմել է ԲԴԽ-ին իր գործը վերանայելու հարցով, սակայն ԲԴԽ-ն որոշել է չվերանայել գործը։ Դատավորը կրկին դիմել է Սահմանադրական դատարան։ ՍԴ-ն երկրորդ անգամ է արձանագրել իրավունքների խախտման փաստը։ Հարությունյանը կրկին դիմել է Բարձրագույն դատական խորհուրդ՝ պահանջելով վերանայել և վերացնել իր լիազորությունները կարգապահական խախտման հիմքով դադարեցնելու ԲԴԽ-ի 2023 թվականի որոշումը, նաև այն չվերանայելու վերաբերյալ 2024 թվականի որոշումը և իրեն վերականգնել դատավորի պաշտոնում։ ԲԴԽ-ն որոշել է վերացնել իր երկու որոշումները և կրկին քննել գործը։

Այսպիսով՝ Հարությունյանին կարգապահական պատասխանատվության ենթարկելու հարցը քննվում է այն կետից, երբ վերջինս դեռևս դատավոր էր։