Պաշտպանության նախարարի մամուլի քարտուղար Արամ Թորոսյանն այսօր առավոտյան ֆեյսբուքյան գրառմամբ անդրադարձել է Factor TV-ի «Տարվա առաջին զոհը բանակում․ 30-ը՝ 2025-ին․ Պապիկյանի հայտարարությունն ու իրականությունը» ռեպորտաժին, նշելով, թե «փորձ է կատարվել 2025 թվականի սկզբին աշխարհազորայինի՝ ոչ ծառայության վայրում, ծառայողական պարտականությունների կատարման հետ առնչություն չունեցող հանգամանքներում տեղի ունեցած մահվան դեպքը (որը դասակարգվում է ծառայության հետ չկապված հանգամանքներում մահվան դեպքերի շարքին) հակադրել ներկայացված վիճակագրությանը, գտնել այսպես կոչված հակասություններ, մինչդեռ հենց մամուլում դեպքի հրապարակված տեսագրությունները փաստում են, որ նշված դեպքը որևէ զորամասի տարածքում տեղի չի ունեցել, մասնակիցներն էլ ծառայության մեջ չեն գտնվել»։
Քանի որ ՊՆ մամուլի քարտուղարի գրառման մեկնաբանությունը փակ էր և չկարողացանք հրապարակային գրառմանը հրապարակային մեկնաբանության ձևաչափով պատասխանել, անդրադառնում ենք այսպես։
Ինչպես ռեպորտաժում է նշվում, այնպես էլ հիմա վերահաստատում ենք, որ 2025-ի առաջին կիսամյակում արձանագրվել է սպանության երկու դեպք, որից մեկը որակվել է զինվորական ծառայության հետ կապված։ Factor TV-ն հղում է կատարում ՀՔԱՎ գրավոր հարցման ՊԱՇՏՈՆԱԿԱՆ պատասխանին։ Այսինքն, սպանության դեպքը ծառայության հետ կապելու կամ չկապելու լիազորություններ չունենք ոչ մենք, ոչ էլ ՀՔԱՎ-ը. պատասխանը ստացվել է գերատեսչության ուղարկված հարցման արդյունքում։
Factor TV-ն ռեպորտաժում նաև շեշտադրում է, որ Պաշտպանության նախարարը, առանց վերջնական օրինական ուժի մեջ մտած դատական ակտերի առկայության, վիճակագրություն է ներկայացնում, որն իրականում կարող է փոփոխվել դատավճռից հետո։
Ռոզա Վարդանյան
