Իրար հետ կապ չունեն. Փաշինյանը` գերիների վերադարձի և սիրիացի վարձկաններին վերադարձնելու մասին․ ՏԵՍԱՆՅՈՒԹ

4 գերիների վերադարձը և Սիրիային 2 վարձկանների փոխանցումը իրար հետ կապ չունեն։ Այս մասին Factor.am-ի հարցին ի պատասխան ասաց վարչապետ Նիկոլ Փաշինյանը:

«Այդ երկու իրադարձությունները իրար հետ կապ չունեն։ Մենք ուզում ենք և աշխատում ենք նաև Սիրիայի Արաբական Հանրապետության հետ մեր հարաբերությունների հետագա զարգացման ուղղությամբ։ Մենք հույս ունենք, որ այդ որոշումը, որը բարեկամական որոշում է Սիրիայի նկատմամբ, այդ թվում՝ Սիրիայի հայ համայնքի շուրջ մթնոլորտը ավելի նպաստավոր կդարձնի»,- ասաց Փաշինյանը։

Հիշեցնենք, որ Ադրբեջանը երեկ՝ հունվարի 14-ին Հայաստանին է փոխանցել 4 հայ գերիների՝ Դավիթ Դավթյանին, Գևորգ Սուջյանին, Վիգեն Էուլջեքջյանին, Վագիֆ Խաչատրյանին: Այս լուրն առաջինը Ֆեյսբուքում հայտնել էր վարչապետ Փաշինյանը, որին հաջորդել էր ԱԱԾ պաշտոնական հաղորդագրությունը։ Շատ չանցած Արդարադատության նախարարությունը հայտնեց, որ ցմահ ազատազրկման դատապարտված Սիրիայի Արաբական Հանրապետության քաղաքացիներ Յուսեֆ Ալաաբեթ ալ-Հաջին և Մուհհռաբ Մուհամմադ ալ-Շխերին Թուրքիայի միջոցով փոխանցվել են Սիրիայի իրավասու մարմիններին։ Նրանք Հայաստանում մեղադրվում էին միջազգային ահաբեկչության, զինված ընդհարումների ժամանակ միջազգային մարդասիրական իրավունքի նորմերի լուրջ խախտումների, վարձկանության հոդվածներով: Ըստ Արդարադատության նախարարության հաղորդագրության՝ նրանք պատժի կրումը կշարունակեն իրենց քաղաքացիության պետությունում։

Մանրամասները՝ տեսանյութում։

Արփի Հակոբյան