06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Իրանը Վենեսուելա չէ, և ԱՄՆ-ը դժվարությունների կբախվի միջամության փորձ անելու դեպքում․ Ռուսլան Սուլեյմանով․ ՏԵՍԱՆՅՈՒԹ
Քաղաքականություն
14.01.2026 | 20:00
Իրանը Վենեսուելա չէ, և ԱՄՆ-ը դժվարությունների կհանդիպի, եթե փորձի միջամտել, Factor TV-ին տված հարցազրույցում նման կարծիք է հայտնում արևելագետ, NEST կենտրոնի փորձագետ Ռուսլան Սուլեյմանովը: Ըստ նրա՝ Թրամփի՝ միջամտելու խոստումները կարող են զայրացնել Թեհրանին՝ ցուցարարներին օգնելու փոխարեն։
Արևելագետը հավելում է՝ փաստ չէ, որ ամերիկյան ներխուժման դեպքում ցուցարարները կանցնեն Վաշինգտոնի կողմը: Իրավիճակի այս բարդությունն էլ բացատրում է, թե ինչու, չնայած իր կտրուկ հայտարարություններին, Թրամփը մինչ այժմ տատանվում է Իրանի վերաբերյալ որոշում կայացնելու հարցում։
Անդրադառնալով Իրանում տեղի ունեցող աննախադեպ բողոքի ցույցերին՝ փորձագետը նշում է, որ նրանց հիմնական խնդիրը վառ արտահայտված առաջնորդի բացակայությունն է: Ռեժիմի կողմնակիցներն Իրանում փոքրամասնություն են կազմում, բայց նրանք ավելի միասնական են և պատրաստ են պայքարել ռեժիմի համար: Արևելագետը հավելում է, որ իրանական էլիտայի բարեփոխական թևը թուլացել է 2018 թվականից ի վեր՝ միջուկային համաձայնագրից Թրամփի դուրս գալուց և պատժամիջոցների խստացումից հետո։
Միաժամանակ, եթե մինչև 2021 թվականը երկրի նախագահները կարող էին հրապարակայնորեն քննադատել հոգևոր իշխանություններին և գերագույն հոգևոր առաջնորդին, վերջին տարիներին նման բան Իրանի քաղաքականության մեջ չի նկատվել։ Ընդ որում, անվտանգության ուժերի, առաջին հերթին՝ ԻՀՊԿ-ի ազդեցությունն աճում է, որը կարող է իշխանությունը զավթել Ալի Խամենեիի մահից հետո։
Փորձագետը նաև նշում է Իրանի վերջին շահի որդու՝ Ռեզա Փահլավիի անսպասելի դերը, որը դարձել է բողոքի ցույցերի վիրտուալ առաջնորդը։ Սակայն ԱՄՆ-ում նրա գտնվելը և բողոքի ցույցերի կազմակերպվածության բացակայությունն Իրանում նրա իրական առաջնորդության հնարավորությունները փոքրացնում են։
Հարցազրույցն ամբողջությամբ՝ տեսանյութում։
Սամվել Մելիքսեթյան
