Քաղաքականություն
05.01.2026 | 15:29
Գրենլանդիայի վարչապետ Յենս-Ֆրեդերիկ Նիլսենը ԱՄՆ նախագահ Դոնալդ Թրամփի՝ կղզու մասին նոր հայտարարություններն անվանել է «անհարգալից», մինչդեռ Դանիայի վարչապետ Մետտե Ֆրեդերիկսենը կոչ է արել ԱՄՆ-ին դադարեցնել սպառնալիքները․ գրում է DW-ի ռուսական ծառայությունը։
Դանիայի և Գրենլանդիայի կառավարությունների ղեկավարները քննադատել են ԱՄՆ նախագահ Դոնալդ Թրամփի կողմից կղզու մասին արված մեկնաբանությունները, որոնք արվել են Վենեսուելայում ԱՄՆ ռազմական գործողության վերաբերյալ քննարկումների ֆոնին։
«Լիովին անիմաստ է խոսել Միացյալ Նահանգների կողմից Գրենլանդիայի բռնագրավման մասին։ ԱՄՆ-ն իրավունք չունի անեքսիայի ենթարկել Դանիայի թագավորությունը կազմող երեք երկրներից որևէ մեկին (Դանիա, Գրենլանդիա և Ֆարերյան կղզիներ – խմբ.)», – Reuters-ը մեջբերում է Դանիայի վարչապետ Մետտե Ֆրեդերիկսենի խոսքերը։ Ապա քաղաքական գործիչը կոչ է արել Միացյալ Նահանգներին «դադարեցնել սպառնալիքներ հնչեցնել պատմականորեն մտերիմ դաշնակցի, ինչպես նաև մեկ այլ երկրի և մեկ այլ ժողովրդի դեմ»։ Նա հիշեցրել է, որ Վաշինգտոնն արդեն պատասխան է ստացել Գրենլանդիայից. կղզին վաճառքի համար չէ։
Գրենլանդիայի վարչապետ Յենս-Ֆրեդերիկ Նիլսենը հայտարարել է․ «Երբ Միացյալ Նահանգների նախագահն ասում է. «մեզ Գրենլանդիան է պետք» և մեզ կապում է Վենեսուելայի և ռազմական միջամտության հետ, դա ոչ միայն սխալ է, այլև անհարգալից»։
Հիշեցնենք, որ ԱՄՆ նախագահ Դոնալդ Թրամփը հայտարարել էր, որ ամերիկացիներին Գրենլանդիան անհրաժեշտ է։
Թարգմանությունը՝ Անահիտ Խաչատրյանի
