Քաղաքականություն
03.01.2026 | 22:27
Դոնալդ Թրամփը մամուլի ասուլիսի ժամանակ խոսել է Վենեսուելայի հարցում ԱՄՆ-ի հետագա քայլերի մասին:
«Նավթի էմբարգոն կմնա ուժի մեջ, ռազմանավերը կմնան պատրաստ վիճակում։ Բոլոր ռազմական տարբերակները չեն բացառվի, քանի դեռ ամերիկյան բոլոր պահանջները չեն բավարարվել: Վենեսուելայի բոլոր քաղաքական գործիչներն ու զինվորականները պետք է հասկանան՝ ինչ պատահել է Մադուրոյի հետ, կարող է պատահել նաև նրանց հետ», – հայտարարել է ԱՄՆ նախագահը։
Նիկոլաս Մադուրոն և նրա կինը գտնվում են ԱՄՆ ռազմական նավի վրա, որը ուղևորվում է Նյու Յորք:
Թրամփի խոսքով՝ ԱՄՆ նավթային ընկերությունները կգան Վենեսուելա.«Մենք պատրաստվում ենք թույլ տալ, որ ամերիկյան խոշորագույն նավթային ընկերությունները գան, միլիարդավոր դոլարներ ծախսեն, վերականգնեն խիստ ավերված ենթակառուցվածքները և սկսեն շահույթ բերել երկրին»,- ասել է Թրամփը:
Վենեսուելայի փոխնախագահ Դելսի Ռոդրիգեսը հեռախոսազրույց է ունեցել պետքարտուղար Մարկո Ռուբիոյի հետ և «պատրաստ է համագործակցել ԱՄՆ-ի հետ», հայտարարել է Թրամփը: Ավելի վաղ ԶԼՄ-ները գրել էին, որ Ռոդրիգեսը գտնվում է Մոսկվայում, ՌԴ ԱԳՆ-ն հերքել է դա:
Թրամփն ասել է, որ կապ չի ունեցել Վենեսուելայի ընդդիմության առաջնորդ Մարիա Կորինա Մաչադոյի հետ: Ըստ ԱՄՆ նախագահի՝ նա չունի «հարգանք կամ աջակցություն», որպեսզի կառավարի երկիրը։
Թրամփը հայտարարել է, որ Մոնրոյի 1823 թվականի արտաքին քաղաքական դոկտրինը «կրկին կարևոր է, այլևս չեն անտեսի այն»: Դոկտրինի համաձայն՝ ԱՄՆ-ը չպետք է թույլ տա, որ այլ երկրներ միջամտեն երկու Ամերիկաների գործերին։
«Ամերիկայի հզորությունը Արևմտյան կիսագնդում այլևս երբեք կասկածի տակ չի դրվի»,- ասել է Թրամփը։
Այսօր՝ հունվարի 3-ին, ԱՄՆ-ն ռազմական գործողություն է իրականացրել Վենեսուելայի դեմ։ ԱՄՆ նախագահ Դոնալդ Թրամփը հաստատել է, որ ԱՄՆ-ն հարվածներ է հասցրել Վենեսուելայում գտնվող օբյեկտներին, երկրից դուրս է բերել նախագահ Նիկոլաս Մադուրոյին: Ամերիկյան կողմի տվյալներով՝ Մադուրոյին և նրա կնոջը այսօր Նյու Յորքում մեղադրանք է առաջադրվել «թմրահաբեկչության», կոկաինի մաքսանենգության և զենք պահելու համար: Թրամփը հրապարակել է Մադուրոյի՝ առևանգումից հետո առաջին լուսանկարը։
