Ինչպես է աշխարհը արձագանքում ԱՄՆ-ի ռազմական գործողությանը Վենեսուելայում

Հունվարի 3-ին ԱՄՆ-ն ռազմական գործողություն է իրականացրել Վենեսուելայի դեմ։ ԱՄՆ նախագահ Դոնալդ Թրամփը հաստատել է, որ ԱՄՆ-ն հարվածներ է հասցրել Վենեսուելայում գտնվող օբյեկտներին, երկրից դուրս է բերել նախագահ Նիկոլաս Մադուրոյին: Ամերիկյան կողմի տվյալներով՝ Մադուրոյին և նրա կնոջը սյսօր Նյու Յորքում մեղադրանք է առաջադրվել «թմրահաբեկչության», կոկաինի մաքսանենգության և զենք պահելու համար: Ինչպես է աշխարհն արձագանքում տեղի ունեցածին:

Վենեսուելայի մի շարք դաշնակիցներ դատապարտել են ԱՄՆ-ի հարվածները երկրին։ Մասնավորապես՝ Ռուսաստանի ԱԳՆ-ն այսօր հայտարարություն է տարածել, որում դատապարտում է «Վենեսուելայի դեմ զինված ագրեսիայի գործողությունը»:

Կուբան և Իրանը նույնպես դատապարտել են ԱՄՆ-ի գործողությունները: Թեհրանը հայտարարել է, որ հարձակումը Վենեսուելայի «ազգային ինքնիշխանության և տարածքային ամբողջականության կոպիտ խախտում են» և կոչ է արել ՄԱԿ-ի Անվտանգության խորհրդին միջամտել:

Հարևան Կոլումբիայի նախագահ Գուստավո Պետրոն իր սոցկայքերում հայտարարել է, որ «Կոլումբիայի կառավարությունը մերժում է Վենեսուելայի և Լատինական Ամերիկայի ինքնիշխանության դեմ ագրեսիան», ինչպես նաև հայտնել է, որ երկու երկրների սահմանին կտեղակայվեն կոլումբիական անվտանգության ուժերը, իսկ փախստականների զանգվածային ներհոսքի դեպքում կգործարկվեն բոլոր հասանելի ռեսուրսները: Պետրոն ավելի ուշ տեղադրել է այրվող մեքենայի տեսանյութը, ենթադրաբար Վենեսուելայից, մակագրելով այն «քաղաքացիական զոհեր՞:

Դեռևս հայտնի չէ Բրազիլիայի արձագանքը։ Մեկ այլ սահմանակից երկրի՝ Գայանայի նախագահ Իրֆաան Ալին այսօր հայտարարել է, որ երկիրը գործի է դրել անվտանգության ծրագիրը՝ առանց այլ մանրամասներ հաղորդելու:

Եվրոպական դիվանագիտության ղեկավար Կայա Կալասը ԱՄՆ-ի կողմից Վենեսուելային հասցված հարվածներից հետո զսպվածության կոչ է արել՝ ընդգծելով, որ «ցանկացած հանգամանքներում» պետք է պահպանվեն միջազգային իրավունքի նորմերը։

«Ես զրուցել եմ ԱՄՆ պետքարտուղար Մարկո Ռուբիոյի և Կարակասում մեր դեսպանի հետ։ ԵՄ-ն ուշադիր հետևում է Վենեսուելայում տեղի ունեցող իրավիճակին»,- գրել է Կալասը X սոցիալական ցանցում։

Նա նշել է, որ Եվրամիությունը «բազմիցս հայտարարել է Նիկոլաս Մադուրոյի ոչ լեգիտիմ լինելու մասին և հանդես է գալիս իշխանության խաղաղ փոխանցման օգտին»։