Կայծակնային շախմատ ԱԱ․ Կարլսենի 9-րդ տիտղոսն ու հայ շախմատիստների արդյունքները

Դոհայում կայացած կայծակնային շախմատի աշխարհի առաջնության չեմպիոնի տիտղոսը նվաճել է նորվեգացի գրոսմայստեր Մագնուս Կարլսենը։

Թայ-բրեյքի եզրափակիչում շախմատի աշխարհի 16-րդ չեմպիոնը հաղթել է ուզբեկ Նոդիրբեկ Աբդուսատորովին։ ՖԻԴԵ-ի դասակարգման առաջատարն 9-րդ անգամ է դարձել կայծակնային շախմատի աշխարհի չեմպիոն։ Ավելի վաղ Կարլսենը նվաճել էր նաև արագ շախմատի աշխարհի առաջնության տիտղոսը։

Կայծակնային շախմատի ԱԱ-ի 14-րդ խաղափուլում Մագնուս Կարլսենին տեխնիկական պարտություն էր գրանցվել Հայաստանի հավաքականի անդամ Հայկ Մարտիրոսյանի դեմ պարտիայում։ Հայ գրոսմայստերը 12 միավորով գրավել է 26-րդ տեղը։

Հայաստանի ներկայացուցիչներից լավագույն արդյունքը գրանցել է Արամ Հակոբյանը, որը 19 հնարավորից վաստակել է 12.5 միավոր ու զբաղեցնել 18-րդ տեղը:
Հայաստանի մյուս ներկայացուցիչներից Ռոբերտ Հովհաննիսյանը գրավել է 57-րդ տեղը (11 միավոր), Շանթ Սարգսյանը՝ 98-րդ (10 միավոր), Մամիկոն Ղարիբյանը՝ 149-րդ (9 միավոր), Ռոբերտ Փիլիպոսյանը՝ 161-րդ (9 միավոր), Էմին Օհանյանը՝ 166-րդ (9 միավոր), Արթուր Դավթյանը՝ 175-րդ (8,5 միավոր)։

Տղամարդկանց առաջնությանը մասնակցել են 64 երկրի 252 շախմատիստներ, այդ թվում՝ 166 գրոսմայստեր:

Կանանց առաջնությունում Հայաստանի ներկայացուցիչներից լավագույն արդյունքը գրանցել է Էլինա Դանիելյանը։ Հայ շախմատիստուհին 15 հնարավորից վաստակել է 8.5 միավոր ու գրավել 38-րդ տեղը, ինչպես նաև հաղթել է չեմպիոնի տիտղոսը նվաճած Բիբիսարա Ասաուբաևային: Լիլիթ Մկրտչյանը 8 միավորով 60-րդն էր, Մարիամ Մկրտչյանը (72-րդ տեղ) և Սուսաննա Գաբոյանը (76-րդ տեղ) վաստակել են 7,5-ական միավոր։