10.08.2026 | 13:40
Կանանց NBA-ում 3 միավորանոց նետումների ռեկորդ է գրանցվել. ՏԵՍԱՆՅՈՒԹ
Փաշինյանը փոփոխություններ է կատարել ԱԱԾ-ի առջև դրված խնդիրներում և գործառույթներում․ դրանցից 2-ը հույժ գաղտնի են
Քաղաքականություն
30.12.2025 | 12:29
Վարչապետ Նիկոլ Փաշինյանը դեկտեմբերի 30-ին որոշում է ստորագրել, որով մի շարք փոփոխություններ է կատարել ազգային անվտանգության ծառայության կանոնադրությունում։ Այն ընդունվել էր դեռևս 2018 թվականի հունիսի 28-ին։
Ազգային անվտանգության ծառայությունն այլևս չի իրականացնի Հայաստանի Հանրապետության տարածքում ազգային անվտանգության խնդիրներին առնչվող՝ հետախուզական գործունեություն ծավալող բոլոր պետական մարմինների և ստորաբաժանումների աշխատանքի օպերատիվ ղեկավարումը:
Ծառայության նպատակներից հանվել է նաև հետախուզական գործունեությունը։
Ազգային անվտանգության ծառայության խնդիրներից հանվում է նաև Հայաստանի Հանրապետության տնտեսական, գիտատեխնիկական և պաշտպանական ներուժի հզորացման, Հայաստանի Հանրապետության անվտանգության ամրապնդման նպատակով հետախուզական տեղեկությունների հավաքումը։
ԱԱԾ խնդիրներից է դարձել պետական սահմանի պահպանության նպատակով հետախուզական գործունեության իրականացումը։
Բացի այդ, արտաքին հակահետախուզական գործունեության շրջանակներում, վարչապետի որոշմամբ սահմանված կարգով համագործակցելով Հայաստանի Հանրապետության արտաքին հետախուզության ծառայության հետ, ՀՀ սահմաններից դուրս Հայաստանի քաղաքացիների և կազմակերպությունների, ինչպես նաև օտարերկրյա պետություններում Հայաստանի դիվանագիտական ծառայության մարմիններում անվտանգության ապահովմանն ուղղված միջոցառումների իրականացումը ընդգրկվել է ծառայության առջև դրված խնդիրներում։
Ազգային անվտանգության ծառայության գործառույթներում այլ փոփոխություններ էլ կան․ Պետական և տեղական ինքնակառավարման մարմիններից, կազմակերպություններից անհատույց եղանակով իր գործունեության համար անհրաժեշտ, օրենսդրությամբ նախատեսված տեղեկատվական համակարգերին և տվյալների շտեմարաններին հասանելիություն ստանալը, այդ թվում՝ առցանց ձևաչափով, այժմ ծառայության գործառույթներից մեկն է։ Դրանցում է ընդգրկվել նաև ազգային անվտանգության ծառայության տնօրենի սահմանած կարգով հատուկ տեխնիկական միջոցների կիրառումը։
Հանցագործությունների մասին հաղորդումների ընդունումը, դրանց նախնական իրավական գնահատական տալը և համապատասխան ընթացքի ապահովումը հանվել է ԱԱԾ գործառույթներից։
Վարչապետի որոշմամբ՝ ևս 2 փոփոխություն է կատարվել ծառայության կանոնադրությունում, որոնք հույժ գաղտնի են։
Նշված փոփոխությունները սկսում են գործել հունվարի 1-ից։
Եվգենյա Համբարձումյան
