27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
ՌԴ ԳՇ-ն հայտնում է դեկտեմբերին ուկրաինական 32, տարվա ընթացքում` 334 բնակավայր վերահսկողության տակ վերցնելու մասին
Քաղաքականություն
29.12.2025 | 22:25
Ռուսաստանի Զինված ուժերի Գլխավոր շտաբի պետ Վալերի Գերասիմովը և զորքերի խմբերի հրամանատարները երկրի նախագահ Վլադիմիր Պուտինին զեկուցել են ռազմական հաջողությունների մասին «հատուկ ռազմական գործողության» գոտում ստեղծված իրավիճակի վերաբերյալ խորհրդակցության ժամանակ, գրում է BBC-ի ռուսական ծառայությունը։
Գերասիմովի խոսքով՝ ««Արևելք» խմբավորման ստորաբաժանումները շարունակում են ջախջախել Կուպյանսկից արևելք գտնվող հակառակորդի կազմավորումները»։ Իսկ «Արևելք» խմբավորման հրամանատար Սերգեյ Կուզովլևը Պուտինին զեկուցել է, որ Կուպյանսկի մոտակայքում գտնվող Ուկրաինայի զինված ուժերի խմբավորումը կոչնչացվի հունվարին կամ փետրվարին։
Նոյեմբերին Գերասիմովը պնդում էր, որ Կուպյանսկն ամբողջությամբ գրավվել է, սակայն այս տեղեկատվությունը չի հաստատվում օբյեկտիվ վերահսկողության միջոցներով կամ ականատեսների վկայություններով։
Նույնիսկ ռուսական Z-բլոգերներն են խոստովանում, որ ռուսական բանակը չի վերահսկում Կուպյանսկը, և այնտեղ գտնվող ռուսական որոշ ստորաբաժանումներ շրջապատված են։
«Կուպյանսկ, Խարկովի մարզ, Ուկրաինա։ Մեր տղաները դեռևս փոքր խմբերով թաքնված են երեք շրջաններում։ Նրանք ամբողջությամբ շրջապատված են։ Նրանք ականապատել են պարագիծը։ Հեղինակն ունի ձայնագրություններ և տեսանյութեր նրանց իրական իրավիճակի մասին, և եթե նրանք զոհվեն, ամեն ինչ կհրապարակվի։ Դուք կարող եք գոնե նրանց համար օդային մատակարարում կազմակերպել, նրանք դրա կարիքն ունեն»,- գրում է ռազմական բլոգեր Ռոմանով Լայթը։
Պուտինի հետ հանդիպման ժամանակ Վալերի Գերասիմովը շարունակել է պնդել, որ Ուկրաինայի զինված ուժերի մի խումբ շրջապատված է Օսկոլ գետի ափին։ Ըստ նրա՝ «լայն ճակատային հարձակում է ընթանում Սլավյանսկի ուղղությամբ» և այլ տարածքներում, մասնավորապես, «Կոնստանտինովկայի ազատագրումը շարունակվում է»։
Ընդհանուր առմամբ, Գերասիմովի հաղորդմամբ՝ ռուսական բանակը դեկտեմբերին վերահսկողություն է հաստատել 32 բնակավայրի նկատմամբ, իսկ ամբողջ տարվա ընթացքում՝ 334-ի նկատմամբ։
Թարգմանությունը`Էմմա Չոբանյանի
