21.01.2026 | 23:30
Ինչ իրավիճակ է Հայաստանի ճանապարհներին և Լարսում
Շատ լավ հարաբերություններ ունենք Հայաստանի հետ, վճռական ենք՝ այդպես շարունակել. Իրանի ԱԳՆ խոսնակ
Քաղաքականություն
29.12.2025 | 16:00
Իրանն իր հարաբերությունները կարգավորում է՝ հիմնվելով ազգային շահերի վրա, և Հայաստանի հետ հարաբերությունները բացառություն չեն այս կանոնից։ Այս մասին հայտարարել է Իրանի ԱԳՆ խոսնակ Էսմայիլ Բաղային՝ ասուլիսի ընթացքում պատասխանելով հարցին, որ ՀՀ վարչապետը հայտարարել է Իրանի հետ ռազմավարական գործընկերության փաստաթուղթ ստորագրելու ցանկության մասին, և հաշվի առնելով, որ Հայաստանը 2025 թվականին ռազմավարական գործընկերության համաձայնագիր է ստորագրել ԱՄՆ-ի, ապա՝ Եվրամիության հետ, ինչպես նաև հաշվի առնելով Իրանի խնդիրները Եվրամիության և Միացյալ Նահանգների հետ պատժամիջոցների ոլորտում, արդյո՞ք Իրանը պատրաստ է ռազմավարական գործընկերության համաձայնագիր ստորագրել Հայաստանի հետ, փոխանցում է IRNA-ն:
«Մեր հարաբերությունները Հայաստանի հետ հիմնված են փոխադարձ շահերի, մտահոգությունների և ընդհանրությունների ճշգրիտ ճանաչման վրա։ Մենք շատ լավ հարաբերություններ ունենք այս երկրի հետ և վճռական ենք՝ շարունակել այդ հարաբերությունները տարբեր ոլորտներում»,- ասել է իրանցի դիվանագետը։
Բաղային նշել է, որ Թեհրանը հարգում է այն փաստը, որ երկրները հարաբերություններ ունեն այլ կողմերի հետ, քանի դեռ դա չի վնասում Իրանի հարաբերություններին:
«Մեր հարաբերություններն այլ երկրների հետ ձևավորվում են փոխադարձ շահերի և մտահոգությունների ուշադիր ուսումնասիրության հիման վրա, և մեր հարաբերությունները Հայաստանի և այլ հարևան երկրների հետ կարգավորվում են այս հիմքով»,- հայտարարել է Իրանի ԱԳՆ խոսնակը:
Թարգմանությունը՝ Էմմա Չոբանյանի
