Ձյուն և ջերմաստիճանի նվազում․ ինչ եղանակ է սպասվում տոնական օրերին․ ՏԵՍԱՆՅՈՒԹ

ՇՄՆ հիդրոօդերևութաբանության և մոնիթորինգի կենտրոնի տնօրենի տեղակալ Գագիկ Սուրենյանը հրավիրված ասուլիսի ժամանակ ներկայացրեց տոնական օրերին և 2026 թվականի հունվարին կանխատեսվող եղանակի մասին տվյալները։

«Հունվարին օդի ամսական միջին ջերմաստիճանը կանխատեսվում է կլիմայական նորմայից բարձր 1-2 աստիճանով, տեղումների քանակը՝ նորմայի սահմաններում: Այսինքն մեզ սպասվում է նորմայից մի փոքր տաք և բավարար տեղումներով հունվար։

Հիմա անցնենք առաջիկա օրերի կանխատեսմանը։ Այսօր մեր երկիրը կրկին գտնվում է ցիկլոնի ազդեցության գոտում, որի ակտիվությունը հատկապես մեծ կլինի Վայոց ձորում և Սյունիքում։ Այսօր ցերեկը շրջանների մեծ մասում սպասվում է ձյուն։ Վայոց ձորի և Սյունիքի մարզում միջին ինտենսիվության, մնացած գոտիներում՝ թույլ։ Առաջիկա գիշերը տեղումները կպահպանվեն միայն Վայոց ձորում և Սյունիքում, մյուս շրջաններում կդադարեն։ Վաղը ցերեկը, այսինքն՝ դեկտեմբերի 30-ի ցերեկը, և դեկտեմբերի 30-ի լույս 31-ի գիշերը երկրի ողջ տարածքում սպասվում է առանց տեղումների եղանակ։ Դեկտեմբերի 31-ին կեսօրից հետո Միջերկրական ծովի շրջաններից Հայաստանին է մոտենում հաջորդ ցիկլոնը։ Այսպիսով՝ դեկտեմբերի 31-ի հետկեսօրյա ժամերից հանրապետության մի շարք շրջաններում կսկսվեն ձյան տեսքով տեղումներ, որոնք կշարունակվեն հունվարի 1-ին, հունվարի 2-ին մինչև կեսօր»,-նշեց նա։

Առաջիկա գիշերը ջերմաստիճանը զգալի կնվազի մոտ 5-7 աստիճանով այսօրվա համեմատ։ Ըստ Սուրենյանի՝ դեկտեմբերի 31-ից հունվարի 1-ն ընկած ժամանակահատվածում ջերմաստիճանը 8-10 աստիճանով կբարձրանա հարավարևմտյան ցիկլոնով և ամպամածությամբ պայմանավորված։ Հունվարի 3-ից սկսած անտիցիկլոնային դաշտի հաստատմամբ պայմանավորված օդի ջերմաստիճանը գիշերային ժամերին կրկին կնվազի մոտ 8-10 աստիճանով։

Մանրամասները՝ տեսանյութում։