Մակրոնը հայտնել է հունվարի սկզբին Փարիզում «կամավորների կոալիցիայի»՝ Ուկրաինայի դաշնակիցների հանդիպման մասին

«Կամավորների կոալիցիայի» հանդիպումը տեղի կունենա Փարիզում հունվարի սկզբին, որի ընթացքում կհամաձայնեցվի յուրաքանչյուր երկրի «կոնկրետ ներդրումը» Ուկրաինայի անվտանգության երաշխիքների հարցում։ Այս մասին հայտարարել է Ֆրանսիայի նախագահ Էմանուել Մակրոնը, գրում է Meduza-ն։

Մյուս եվրոպացի առաջնորդների հետ միասին Մակրոնը մասնակցել է Դոնալդ Թրամփի և Վլադիմիր Զելենսկիի՝ Ֆլորիդայում հանդիպումից հետո կայացած հեռախոսազրույցին, ապա առանձին զրուցել է Զելենսկիի հետ։

«Մենք առաջընթաց ենք գրանցում անվտանգության երաշխիքների հարցում, որոնք կենտրոնական դեր կունենան արդար և երկարատև խաղաղության կառուցման գործում»,- գրել է Մակրոնը։

Հանդիպումից հետո Զելենսկին անձամբ շնորհակալություն է հայտնել Թրամփին և նրա թիմին։ Նրա խոսքով՝ կողմերը համաձայնել են, որ անվտանգության երաշխիքները «երկարատև խաղաղության հասնելու բանալին են», և երկու թիմերն էլ «կշարունակեն աշխատել բոլոր ասպեկտների վրա»։ Հունվարին Թրամփը Վաշինգտոնում կհյուրընկալի Ուկրաինայի և Եվրոպայի ներկայացուցիչներին, հավելել է Զելենսկին։

Զելենսկին նախկինում ներկայացրել էր անվտանգության երաշխիքները, որոնք Ուկրաինան ակնկալում է Եվրոպայից և Միացյալ Նահանգներից: Դրանք ենթադրում են Ուկրաինայի զինված ուժերի 800,000-անոց թվաքանակի պահպանում, Ուկրաինայի անդամակցություն Եվրամիությանը, իսկ «կամավորների կոալիցիան» Կիևին կապահովի «անվտանգություն երկնքում, ցամաքում և ծովում», ինչպես նաև էներգետիկայի, ֆինանսների, օգնության և ապաստարանի ոլորտներում: Ավելին, Ուկրաինան Միացյալ Նահանգներից ակնկալում է իրավաբանորեն պարտավորեցնող (հատկապես՝ Կոնգրեսի կողմից) անվտանգության երաշխիքներ:

Թարգմանությունը՝ Էմմա Չոբանյանի