Վահե Գևորգյան․ Տարվա լավագույն մարզիչ լինելը պարտավորեցնող է

Երևանի «Ալաշկերտը» գլխավորող Վահե Գևորգյանն առաջին անգամ Հայաստանի տարվա լավագույն մարզիչ ճանաչվելուց հետո կիսվել է տպավորություններով։

«Ինձ համար այս մրցանակը թիմային աշխատանքի արդյունքն ու գնահատականն է։ Առաջին հերթին ցանկանում եմ շնորհակալություն հայտնել իմ մարզչական շտաբին ու ֆուտբոլիստներին, բոլոր երկրպագուներին, որոնք միշտ աջակցել, հավատացել ու եղել են մեր կողքին։ Շնորհակալություն եմ հայտնում ակումբի ղեկավարությանն ու աշխատակիցներին, բոլոր այն մարդկանց, որոնց հետ անցել ենք այս ճանապարհը։ Շնորհակալ եմ ինձ քվեարկողներին, տարվա լավագույն մարզիչ լինելը պարտավորեցնող է»,- Վահե Գևորգյանի խոսքը մեջբերում է ակումբի մամուլի ծառայությունը։

Հիշեցնենք, որ ԶԼՄ-ների ներկայացուցիչների ու Fastex Պրեմիեր լիգայի ակումբների մասնակցությամբ քվեարկության արդյունքում 38-ամյա մասնագետը ստացել էր 13 ձայն։ Երկրորդ տեղը գրավել էր Հայաստանի ազգային հավաքականի գլխավոր մարզիչ Եղիշե Մելիքյանը (9 ձայն), եռյակը եզրափակել է «Արարատ-Արմենիայի» նախկին գլխավոր մարզիչ Վարդան Մինասյանը (3 ձայն)։

Վահե Գևորգյանն ամռանն է գլխավորել «Ալաշկերտը», որը Հայաստանի ընթացիկ առաջնությունում 15 խաղից հետո ունի 29 միավոր և «Ուրարտուի» ու «Փյունիկի» հետ բաժանում է 2-4-րդ տեղերը։ Անցնող տարում Գևորգյանը գլխավորել է նաև Չարենցավանի «Վանը», որը Fastex Պրեմիեր լիգայի 2024/25 մրցաշրջանում պայքարում էր եվրագավաթների ուղեգրի համար և գրավել էր 5-րդ տեղը։