23.01.2026 | 18:25
Նաիր Թիկնիզյանը մոտիվացնող գրառում է արել Եվրոպայի լիգայի փլեյ-օֆֆ դուրս գալուց հետո
Անկլավների հարցը կլուծվի ՀՀ-ի հետ սահմանազատման գործընթացում, իսկ TRIPP-ի երկաթուղին ՌԴ-ին չի վերաբերվում. Բայրամով
Քաղաքականություն
26.12.2025 | 19:09
Ադրբեջանի և Հայաստանի միջև անկլավների ու էքսկլավների հարցերը կլուծվեն սահմանների սահմանազատման ընթացիկ գործընթացի շրջանակում։ Այս մասին հայտարարել է արտաքին գործերի նախարար Ջեյհուն Բայրամովը տարեկան ամփոփիչ ասուլիսում։
Նրա խոսքով՝ այդ հարցերը երկու կողմերի համար հիմնական ուշադրության կենտրոնում են։ Նախարարը նաև վստահություն է հայտնել, որ 2026 թվականին սահմանազատման գործընթացում առաջընթաց կգրանցվի։ Ադրբեջանի և Հայաստանի միջև սահմանի գրեթե 13 կմ երկարությամբ տարածք սահմանազատվել է, հավելել է ադրբեջանցի պաշտոնյան։
«Սահմանազատումը պարզապես պարբերական հանձնաժողովների նիստերի հարց չէ։ Դա բարդ, քաղաքականապես զգայուն գործընթաց է՝ տեխնիկական մանրամասներով։ Գլխավորն այն է, որ համաձայնություն է ձեռք բերվել ընդհանուր մոտեցման վերաբերյալ. գործընթացը կընթանա հյուսիսից հարավ։ Սահմանազատումը կիրականացվի փուլերով։ Անկլավների և էքսկլավների հարցերը մնում են հիմնական ուշադրության կենտրոնում և կլուծվեն այս գործընթացի շրջանակում։ Բարձր մակարդակի հանդիպումների առումով, սահմանազատման հանձնաժողովի 12-րդ նիստն առաջին անգամ տեղի է ունեցել Գաբալայում: Ի տարբերություն առաջին 11 հանդիպումների՝ այն սահմանին չի անցկացվել: Նմանատիպ հանդիպումներ կարող են անցկացվել նաև Հայաստանում»,- նշել է Բայրամովը։
Նա անդրադարձել է նաև TRIPP նախագծին ու ընդգծել, որ ԱՄՆ ներկայացուցիչները ներկայում բանակցություններ են վարում Հայաստանում նախագծի վերաբերյալ։
TRIPP նախագիծը արտացոլված է Վաշինգտոնի համաձայնագրերում.
«Այս համատեքստում ԱՄՆ-ի և Հայաստանի միջև համագործակցությունն արդեն իսկ հաստատվել է: Այս նախագիծը մեծ նշանակություն ունի ԱՄՆ-ի համար. նախագահ Թրամփը նույնիսկ իր անունն է տվել դրան: Այժմ ԱՄՆ ներկայացուցիչները գտնվում են Հայաստանում և բանակցություններ են վարում: Ձևաչափը երկկողմանի է, բայց մենք նախապես նրանց հայտնել ենք Ադրբեջանի ակնկալիքներն ու օրինական շահերը: Մենք կարծում ենք, որ դրանք հաշվի կառնվեն։ Ադրբեջանի և Նախիջևանի Ինքնավար Հանրապետության միջև կապի հաստատումը նախատեսված էր 2020 թվականի համաձայնագրով, բայց Հայաստանն անցյալ տարիներին որևէ քայլ չի ձեռնարկել: Սակայն Ադրբեջանն անմիջապես սկսեց աշխատանքները իր սեփական տարածքում, և դրանք գրեթե ավարտված են: Հայաստանը որևէ աշխատանք չի կատարել իր սեփական տարածքում»,- ասել է Բայրամովը։
Ըստ նրա՝ հնարավոր է՝ Հայաստանը, TRIPP-ի շրջանակում պարտավորություններ ստանձնելիս, հաշվի է առել նաև երկաթուղու հարցը։
Ադրբեջանցի նախարարը նշել է, որ Ռուսաստանը երկաթուղային համաձայնագիր է ստորագրել Հայաստանի հետ, որն ուժի մեջ կլինի մինչև 2038 թվականը։
«Այնուամենայնիվ, մեզ համար Հայաստանի դիրքորոշումն այն է, որ TRIPP նախագծով անցնող երկաթուղու հատվածը չի վերաբերում Ռուսաստանին: Քանի որ այդ երկաթուղին գոյություն չուներ համաձայնագրի ստորագրման պահին, անհնար է համաձայնագրում ներառել այն, ինչը գոյություն չի ունեցել»,- ասել է Ջեյհուն Բայրամովը։
Թարգմանությունը՝ Էմմա Չոբանյանի
