15.02.2026 | 12:11
Փրկարարներն արգելափակումից դուրս են բերել 243 տրանսպորտային միջոց և օգնություն ցուցաբերել 379 քաղաքացու
Սիրիական Հոմսի մզկիթում պայթյունի հետևանքով զոհվել է առնվազն վեց մարդ
Քաղաքականություն
26.12.2025 | 17:41
Սիրիայի Հոմս նահանգի մզկիթում տեղի ունեցած պայթյունի հետևանքով զոհվել է առնվազն վեց մարդ, իսկ ավելի քան 20-ը՝ վիրավորվել, գրում է Al Jazeera-ն։
Հարձակումը թիրախավորել է Հոմսի Վադի ադ-Դահաբ թաղամասում գտնվող շիաների Իմամ Ալի բին Աբի Թալիբ մզկիթը ուրբաթօրյա աղոթքի ժամանակ, հաղորդում է սիրիական SANA լրատվական գործակալությունը։
Հրապարակված կադրերում երևում է, թե ինչպես են մարդիկ խուճապահար փախչում մզկիթից, որոշ զոհերի պառկեցնում պատգարակների վրա, իսկ մյուսներին՝ փաթաթված թիկնոցներով, տեղափոխում շտապօգնության մեքենաների մոտ։ Պայթյունը, կարծես, տեղի է ունեցել մզկիթի գլխավոր աղոթասրահի անկյունում։
Տեղի պաշտոնյաները Reuters-ին հայտնել են, որ պայթյունը կարող էր տեղի ունենալ մահապարտ ահաբեկչի կամ մզկիթում տեղադրված պայթուցիկների պատճառով։
Պետական լրատվամիջոցները հայտնել են, որ անվտանգության ուժերը շրջափակել են տարածքը և հետաքննություն են անցկացնում։
Al Jazeera-ի Հալեպի թղթակից Այման Օհաննան նշել է, որ Հոմսում բնակվում են ալավիների, քրիստոնյաների և սուննի մուսուլմանների բազմազան բնակչություն։ Նա ասել է, որ հարձակումը թիրախավորել է ալավիական մզկիթը՝ զգուշացնելով, որ դա կարող է «սրել կրոնական լարվածությունը» ամբողջ երկրում։
Նա ասել է, որ ոչ մի խմբավորում պատասխանատվություն չի ստանձնել հարվածի համար, սակայն նշել է վերջերս Սիրիայում ԻԼԻՊ-իակտիվության աճը։ Նա հավելել է, որ կառավարական ուժերը գործողություն են իրականացրել Հալեպի մոտակայքում՝ ձերբակալելով ԻԼԻՊ-ի երեք ենթադրյալ անդամների։
Անցյալ շաբաթ Միացյալ Նահանգները ռմբակոծել էր ԻԼԻՊ-ի դիրքերը Սիրիայում՝ ի պատասխան երկու ամերիկացի զինվորների և քաղաքացիական թարգմանչի սպանության։
Այսօրվա հարձակումն ընդգծում է երկրի փխրուն անվտանգության իրավիճակը, քանի որ Դամասկոսի նոր իշխանությունները պայքարում են վերահսկողություն հաստատելու համար։
Թարգմանությունը՝ Էմմա Չոբանյանի
