27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
Վարչական մարմինները չեն կարողանա բողոքարկել 300 հազար դրամը չգերազանցող դատական ակտերը․ ինչ խնդիր է լուծում օրենսդրական նախաձեռնությունը
Հասարակություն
25.12.2025 | 16:09
Արդարադատության նախարարությունը հանդես է եկել օրենսդրական նախաձեռնությամբ, համաձայն որի՝ վարչական մարմինները 300․000 դրամը չգերազանցող վարչական տուգանքների դեպքում դատական ակտերի բողոքարկման հնարավորություն չեն ունենա։ Արդարադատության նախարար Սրբուհի Գալյանը Factor TV-ի հետ հարցազրույցում նշեց, որ այս նախաձեռնությամբ ակնկալվում է լուծել Վարչական վերաքննիչ դատարանի ծանրաբեռնվածության հարցը։
«Մենք ուսումնասիրել ենք վիճակագրական տվյալները և տեսել ենք, որ Վարչական դատարանը շատ հաճախ ծանրաբեռնվում է շատ փոքր տուգանքներ պարունակող վարչական ակտերի բողոքարկումներով։ 80-90 տոկոսը 25․000 դրամը չգերազանցող վարչական տուգանքներն են։ Եվ հաշվարկել ենք, որ արդարադատությունը, որն իրականացվում է այդ գործերով, ավելի թանկ է, քան այդ բողոքարկման արդյունքում հնարավոր հետ վերադարձվելիք գումարը, որը դրվել է վարչական ակտի հիմքում»,- ասաց Գալյանը։
Նախարարի խոսքով՝ այսպիսի օրենսդրական նախաձեռնությամբ հանդես գալու համար հիմք է հանդիսացել նաև այն հանգամանքը, որ այս բնույթի գործերը 70-80 տոկոս դեպքերում մերժվում են Վարչական վերաքննիչ դատարանի կողմից։ Բացի այդ, ըստ նախարարի, սա նաև յուրահատուկ մեսիջ է վարչական մարմիններին, որ ավելի մեծ ուշադրություն դարձնեն պատշաճ վարչարարության իրականացմանը՝ գիտակցելով, որ հակառակ դեպքում զրկված են լինելու իրենց իրավունքները վերաքննության եղանակով պաշտպանելու հնարավորությունից։ Նախարարը նաև ընդգծեց, որ սահմանփակվում է միայն վարչական մարմինների բողոքարկման իրավունքը, իսկ քաղաքացիները կշարունակեն օգտվել իրենց բողոքարկման իրավունքից։
Հարցազրույցն ամբողջությամբ կարող եք դիտել այսօր Factor TV-ի յութուբյան ալիքում, ժամը՝ 20։00-ին։
Արաքս Մամուլյան
