Հայաստանի ֆուտբոլի ֆեդերացիան դեկտեմբերի 19-ից անցկացնում է «Տարվա լավագույն ֆուտբոլիստ» և «Տարվա լավագույն մարզիչ» անվանակարգերում քվեարկությունը, որին մասնակցում են ԶԼՄ-ների ներկայացուցիչները և Fastex Պրեմիեր լիգայի 2025-2026թթ. մրցաշրջանի մասնակից ակումբները։
Եթե լավագույն ֆուտբոլիստի մրցանակի հավակնորդների ցանկը բավական մեծ է (22 խաղացող), ապա լավագույն մարզիչի թեկնածուներն ընդամենը հինգն են՝ Եղիշե Մելիքյան (Հայաստանի ազգային հավաքական / «Փյունիկ»), Վահե Գևորգյան («Ալաշկերտ» / «Վան»), Ռոբերտ Արզումանյան («Ուրարտու»), Վարդան Մինասյան (առանց ակումբ / «Արարատ-Արմենիա»), Արտակ Օսեյան («Փյունիկ»):
Շատերի համար զարմանալի էր, որ լավագույն մարզիչի թեկնածուների թվում տեղ չեն գտել նախորդ մրցաշրջանում «Նոային» Հայաստանի չեմպիոն ու գավաթակիր դարձրած պորտուգալացի Ռուի Մոտան ու ամռանը նրան փոխարինած Սանդրո Պերկովիչը։ Խորվաթ մասնագետի գլխավորությմաբ «Նոան» այս մրցաշրջանում նվաճել էր Կոնֆերենցիաների լիգայի անցումային փլեյ-օֆֆի ուղեգիր՝ դառնալով առաջին հայկական ակումբը, որը կխաղա եվրագավաթների փլեյ-օֆֆում։
ՀՖՖ-ից Factor TV-ի հետ զրույցում նշեցին, որ այս տարի փոփոխություն է տեղի ունեցել լավագույն մարզիչի թեկնածուների ցանկի ընտրության հարցում։ Հավակնորդների թվում ընդգրկվել են միայն հայաստանցի մարզիչները։ Ցուցակում կարող է լինել նաև Հայաստանի ազգային հավաքականի օտարերկյա գլխավոր մարզիչը։
«Այս տարի փոփոխություն է տեղի ունեցել լավագույն մարզիչի թեկնածուների ընտրության հարցում։ Ցուցակում ընդգրկվել են միայն հայաստանցի մարզիչներն ու Հայաստանի ազգային հավաքականի գլխավոր մարզիչը։ Թեկնածուների թվում կարող է լինել նաև հավաքականի օտարերկյա մարզիչը, եթե գրանցում է լավ արդյունքներ։ Դա միջազգային նորմալ պրակտիկա է, երբ ամեն ֆեդերացիա ընտրում է իր երկրի լավագույն մարզիչին։ Իսկ Հայաստանի առաջնությունում աշխատող արտասահմանցի մարզիչները մրցաշրջանի վերջում լավագույնի կոչման համար կպայքարեն Fastex Պրեմիեր լիգայի վարկածով։ Տարվա լավագույն ֆուտբոլիստի մրցանակի հավակնորդների ցանկում էլ տեղ չեն գտել Fastex Պրեմիեր լիգայի լեգեոնականները։
Նախորդ տարիներին ընտրվել է Հայաստանի տարվա լավագույն մարզիչը, իսկ այս տարի ընտրվելու է լավագույն հայաստանցի մարզիչը»,- նշել են ՀՖՖ-ից։
Հարցին՝արդյոք թեկնածուների ցուցակում կարող են ընդգրկվել արտասահմանում աշխատող հայ մարզիչները, ֆեդերացիայից պատասխանեցին․ «Արտերկրում աշխատող հայ մարզիչները ևս կարող են լինել հավակնորդների թվում։ Պարզապես այս տարի արտասահմանում լուրջ հաջողությունների հասած մարզիչներ չկան, դրա համար ցուցակում ընդգրկվել են միայն հայաստանցի մարզիչները»։
«Տարվա լավագույն ֆուտբոլիստ» և «Տարվա լավագույն մարզիչ» անվանակարգերում քվեարկությունը կավարտվի դեկտեմբերի 25-ին։
Դավիթ Եղիազարյան
