17.05.2026 | 23:35
Հենրիխ Մխիթարյանը՝ «Ինտեր» – «Վերոնա» հանդիպման լավագույն ֆուտբոլիստ․ ՏԵՍԱՆՅՈՒԹ
Լեհաստանը 2026թ․ ապրիլի 1-ից կարգելի ոչ կենսաչափական անձնագրեր ունեցող ՌԴ քաղաքացիների մուտքը երկիր
Քաղաքականություն
25.12.2025 | 12:42
Լեհաստանը կդադարեցնի ճանաչել Ռուսաստանի քաղաքացիների հնգամյա ոչ կենսաչափական անձնագրերը 2026 թվականի ապրիլի 1-ից, գրում է Current time-ը։
Մինչ այդ, 2026 թվականի հունվարի 1-ից էլ կենսաչափական չիպ չունեցող ռուսական դիվանագիտական և ծառայողական անձնագրերի տերերին կարգելվի մուտք գործել երկիր։
Դանիան, Իսլանդիան, Լատվիան, Լիտվան, Ֆրանսիան, Չեխիան և Էստոնիան ավելի վաղ արգելել էին ոչ կենսաչափական անձնագրեր ունեցող Ռուսաստանի քաղաքացիների մուտքը։ Գերմանիան և Ռումինիան այս որոշմանը կմիանան 2026 թվականի հունվարի 1-ից։
Լիտվայի իշխանությունները նշել են, որ կենսաչափական տվյալներ չունեցող անձնագրերը կարող են օգտագործվել Ռուսաստանի հատուկ ծառայությունների կողմից արտասահմանում գործողությունների համար: Այնուամենայնիվ, ըստ հաղորդումների, բացառություններ կարող են արվել ժողովրդավարական ուժերի, ընդդիմության, անկախ լրատվամիջոցների և քաղաքացիական հասարակության ներկայացուցիչների համար։
2025 թվականի մարտին Չեխիայի այն ժամանակվա արտաքին գործերի նախարար Յան Լիպավսկին հայտարարել էր, որ ռուսաստանցիների համար այս պահանջը թելադրված է ազգային անվտանգության խնդիրներով։
«Մենք չենք սպասի ևս մեկ դիվերսիայի։ Մեր երկրում մնալ ցանկացող յուրաքանչյուր ոք պետք է ապացուցի, որ ինքն նա է, ինչպես ներկայանում է։ Հետևաբար, ոչ կենսաչափական անձնագրերը, ինչպիսիք օգտագործել են Վրբետիցեի մարդասպանները, բավարար չեն լինի ռուսաստանցիների համար»,- ասել էր նա։
Ռուսաստանում հասանելի են երկու տեսակի անձնագրեր՝ կենսաչափական տվյալներով և առանց դրանց (որը տրամադրվում է ավելի արագ և ավելի ցածր գնով): Ոչ կենսաչափական անձնագրերը տրամադրվում են հինգ, կենսաչափականները՝ տասը տարով:
Թարգմանությունը՝ Էմմա Չոբանյանի
