14.02.2026 | 17:01
Հայ և ադրբեջանցի փորձագետների համատեղ ասուլիսը. ՏԵՍԱՆՅՈՒԹ
Մետրոյի 11-րդ կայարանը․ տարիներն անցնում են, գնացքը չի գալիս․ ՏԵՍԱՆՅՈՒԹ
Քաղաքականություն
24.12.2025 | 21:15
Արդեն մի քանի տասնամյակ երևանցիների համար մետրոյի 11-րդ կայարանը շարունակում է երազանք մնալ։ Դեպի «Աջափնյակ» կայարան տանող թունելները փորվել են դեռևս Խորհրդային Միության տարիներին, նախանշված էր նաև կայարանի մուտքը։ Մնում էր միայն կառուցել Հրազդանի կիրճի վրայով անցնող կամուրջն ու անցկացնել գծերը։ Բայց նախագիծը շարունակում է չիրագործված մնալ։
Քաղաքապետ Տարոն Մարգարյանի պաշտոնավարման օրոք քաղաքային իշխանությունները մետրոյի նոր կայարանի կառուցումն առաջնահերթություն չէին համարում։
«Ես ՏԻՄ գրեթե 10 տարուց ավելի աշխատել եմ, լավ տիրապետում եմ քաղաքային տնտեսությանը։ Մենք շատ լուրջ ուսումնասիրություններ ենք կատարել նաև մետրոյի նոր կայարաններ կառուցելու ուղղությամբ։ Դրա համար շատ միջոցներ են անհրաժեշտ։ Հետագայում, երբ մեր քաղաքացիների առաջնային խնդիրները լուծենք, անպայման դրա մասին կխոսենք»,- դեռևս 2017-ի ապրիլին ասել էր Մարգարյանը։
Մետրոյի նոր կայարանի կառուցման վերաբերյալ խոսակցություններն ակտիվացան 2018 թվականի իշխանափոխությունից հետո։ 2019-ի հոկտեմբերի 29-ին այդ ժամանակ Երևանի քաղաքապետ Հայկ Մարությանի մամուլի քարտուղար Հակոբ Կարապետյանը հրապարակեց կայարանի էսքիզային առաջարկը։
«Նախատեսվում է կայարանը տեղակայել Հրազդան գետի վրա կառուցվելիք կամրջի վրա, ինչը հնարավորություն կտա մետրո մուտք գործել/դուրս գալ ձորի աջ և ձախ կողմերից էլ՝ Հալաբյանից ու Կիևյանի հատվածից: Այս տարբերակը ենթադրում է նաև մետրոպոլիտենի զարգացումը Աջափնյակ-Դավթաշեն ուղղությամբ՝ ավելի երկարաժամկետ հեռանկարով»,- նշել էր Կարապետյանը:
Հաջորդ 2 տարիներին այդպես էլ բանը չհասավ գործողություններին։ 2022-ին Հայկ Մարությանի պաշտոնանկությունից հետո խոսակցությունները նոր թափ ստացան։ Նախագծի իրագործման գործում քաղաքային իշխանություններին իր աջակցությունը հայտնեց նաև Կառավարությունը։
«Հույս ունեմ՝ ժամկետները չեն խախտվի, ես մի քիչ էլ ավելացված ժամկետով ասացի։ 2024-ին պետք է սկսենք «Աջափնյակ» կայարանի շինարարությունը»,- 2022-ին ասել էր Նիկոլ Փաշինյանը։
Նոր կայարանի կառուցման ուղղությամբ որևէ աշխատանք, սակայն, դեռևս չի արվել, իսկ կայարանի կառուցման համար նախատեսված բյուջետային հատկացումները կտրուկ վերանայման են ենթարկվել։ Այս աշխատանքների համար նախատեսված 9,6 միլիարդ դրամից մնացել է 1,6 միլիարդը։
«Որտե՞ղ են ուղղվել այդ գումարները։ Քանի որ տրանսպորտային ոլորտի համար նախատեսված գումարներ էին, դրանց էական մասն ուղղվել է մեր տրոլեյբուսների գնմանը»,- նշեց քաղաքապետ Տիգրան Ավինյանը։
Նրա խոսքով՝ առաջիկայում նախատեսվում է Կառավարության առանձին որոշում ընդունել կայարանի կառուցման մրցույթի հետ կապված՝ հատուկ պայմաններ ավելացնելով։ Քաղաքապետը պարզաբանում է՝ նախագիծը բարդության 5-րդ աստիճանի է, և միայն դրա պարզ փորձաքննությունը տևել է մոտ մեկ տարի։
«Սա արդարացում չի էլի, բարդ պրոցես է։ Ես ձեզ վստահեցնում եմ՝ ոնց ունեցել ենք կասկադը, այդպես էլ ունենալու ենք մետրոյի նոր կայարանի կառուցումը»,- նշեց նա։
Քաղաքային իշխանության ներկայացուցիչները հիմա ժամկետներ ասելուց արդեն խուսափում են։ Ավելի վաղ Տիգրան Ավինյանը հայտարարել էր, որ մետրոյին կառուցման համար շուրջ 4 տարի կպահանջվի։ Եթե անգամ շինարարությունը սկսվի 2026-ին, ապա կավարտվի 2030 թվականին։ Ստացվում է՝ հեղափոխությունից հետո տրված խոստման իրագործումն իշխանություններից, լավագույն դեպքում, 12 տարի կպահանջի։
Մանրամասները՝ տեսանյութում։
Եվգենյա Համբարձումյան
