10.09.2026 | 23:04
ԿԳՄՍ նախարարը մանկավարժների հետ ոլորտային հարցեր է քննարկել
4.3 մլն դրամ՝ Իջևանում ամանորյա համերգի համար․ կերգի Արամ MP3-ն
24.12.2025 | 12:50
Իջևանի համայնքապետարանը ամանորյա և սուրբծննդյան միջոցառումների կազմակերպման ծառայությունների պայմանագիր է կնքել ՋԵՄԻՆԻ ՀԱԲ ՍՊԸ-ի հետ։ Պայմանագրի արժեքը կազմել է 4 մլն 340 հազար դրամ։ Factor.am-ը ուսումնասիրել է համայնքապետարանի և ընկերության միջև կնքված պայմանագիրը։
Ըստ պայմանագրի՝ ընկերությունը միջոցառումը պետք է կազմակերպի Իջևան համայնքի Աշոտ Մելիքբեկյան փողոցի շատրվանների հրապարակում՝ առկա բեմահարթակի վրա։ Համայնքապետարանը մատակարարից պահանջել է, որ միջոցառումն անցկացվի հայտնի երգիչ- երգչուհիների մասնակցությամբ և տևի առնվազն 2,5 ժամ։
«Համերգային մասը կազմակերպելու համար անհրաժեշտ են 2 պրոֆեսիոնալ հաղորդավարներ (կին և տղամարդ), հանդիսավարի թեկնածությունը համապատասխանեցնել համայնքապետարանի համապատասխան բաժնի հետ, պետք է լինեն հայկական շոու բիզնեսի հայտնի 1-2 երգիչ-երգչուհիներ, որոնց բոլոր կատարումները պետք է լինեն կենդանի ձայնով, ելույթների ընդհանուր տևողությունը 1 ժամ։ Երգիչների ցանկում պետք է ներգրավված լինեն Սոնա Ռուբենյանը, Գարիկ Պապոյանը կամ Իվետա Մուկուչյանը կամ Արամ MP3-ն կամ Արամեն»,- գրված է պայմանագրում։
Համայնքապետարանին անհրաժեշտ է նաև փորձառու DJ, ելույթի ընդհանուր տևողությունը՝ 3 ժամ։ Մատակարարը իր կողմից պետք է ապահովի լուսային և ձայնային տեխնիկա, լեդ էկրան։
Իջևանի համայնքապետարանը օրեր առաջ տեղեկացրել է, որ ամանորյա միջոցառումը կկայանա դեկտեմբերի 28-ին՝ ժամը 18:00-ին։ Այդ մասին համայնքապետարանի էջում հրապարակված տեսագրությամբ հայտնել է երգիչ Արամ MP3-ն՝ նշելով, որ այդ օրը հանդես կգա համերգային ծրագրով։
Իսկ որ ընկերության հետ է համագործակցում Իջևանի համայնքապետարանը։ Իրավաբանական անձանց պետական ռեգիստրից տեղեկանում ենք, որ ՋԵՄԻՆԻ ՀԱԲ ՍՊԸ-ն հիմնադրվել է այս տարվա մարտի 3-ին, գործադիր ղեկավարը Ջեմմա Թադևոսյանն է։ Հետաքրքրական է, որ 5000 դրամ կանոնադրական կապիտալ ունենալով՝ ընկերությանը 4 մլն-ի հասնող պայմանագիր է կնքում։
Ըստ էլեկտրոնային գնումների ARMEPS համակարգի՝ սա սահմանափակ պատասխանատվությամբ ընկերության համար տոնական միջոցառում կազմակերպելու առաջին փորձն է, այդուհանդերձ, ՋԵՄԻՆԻ ՀԱԲ ՍՊԸ-ի գործադիր ղեկավարը պետական գնումներին մասնակցում է նաև որպես Ջեմմա Թադևոսյան Արմենի Ա/Ձ։ Բացի մշակութային միջոցառումների կազմակերպումից, անհատ ձեռնարկատերը համայնքային մարմինների համար իրականացրել է մի շարք այլ աշխատանքներ՝ Երևանում ձեռք բերելով նստարաններ, Դիլիջանում կառուցելով կանգառներ և այլն։
Անի Թամրազյան
