10.09.2026 | 23:04
ԿԳՄՍ նախարարը մանկավարժների հետ ոլորտային հարցեր է քննարկել
ՌԴ-ն փորձում է Իրանին մղել՝ միասին դեմ հանդես գալ TRIPP-ին․ Հովսեփ Խուրշուդյան․ ՏԵՍԱՆՅՈՒԹ
Քաղաքականություն
23.12.2025 | 21:30
Առաջիկա ընտրությունների ժամանակ Ռուսաստանը կփորձի փոխել Հայաստանում իշխանություն, կարծում է վերլուծաբան, «Ազատ քաղաքացի» ՀԿ ղեկավար Հովսեփ Խուրշուդյանը։
Factor TV-ին տված հարցազրույցում Խուրշուդյանը նշում է, որ Սանկտ Պետերբուրգում Փաշինյան-Պուտին հանդիպման ժամանակ երկրների միջև համագործակցության զարգացման մասին արված հայտարարությունները դեկլարատիվ բնույթ են կրում, նաև կարծիք հայտնում, որ Ռուսաստանի, Հայաստանի և այլ երկրների միջև համագործակցության առկա ձևաչափերն անարդյունավետ են եղել։
Ռուսաստանը, ըստ նրա, ակտիվորեն ներգրավված է Հայաստանի դեմ հիբրիդային հարձակումներում, և ԵՄ-ի աջակցությունն այդ հարձակումներին հակազդելու գործում կարևոր է։ ԵՄ-ն, չնայած ոչ պաշտոնապես, բայց Հայաստանի իրական դաշնակիցն է և դրական է վերաբերվում Հայաստանի կառավարության ժողովրդավարացման ուղղությամբ ձեռնարկած քայլերին, կարծում է Խուրշուդյանը։
Անդրադառնալով TRIPP-ի վերաբերյալ Իրանի և Ռուսաստանի բարձրաստիճան պաշտոնյաների հայտարարություններին՝ վերլուծաբանը նշում է, որ Ռուսաստանը փորձում է խրախուսել Իրանին՝ միասին դեմ հանդես գնալ TRIPP-ին։
Հարցին՝ արդյո՞ք ԵՄ-ի հետ խորացող հարաբերությունները կարող են համատեղվել ԵՏՄ-ին Հայաստանի անդամակցության հետ, Խուրշուդյանը նշում է, որ հայկական ապրանքները պետք է համապատասխանեն ԵՄ չափանիշներին, նախքան Հայաստանը որոշի դադարեցնել ԵՏՄ-ին անդամակցությունը։ Հայ-ադրբեջանական հարաբերությունների վերաբերյալ փորձագետը նշում է, որ երկու երկրներն էլ շահագրգռված են անկախության պահպանմամբ և այս հարցում բախվում են Ռուսաստանի կողմից նմանատիպ սպառնալիքի։
Ինչ վերաբերում է ադրբեջանական բենզինի մատակարարմանն ու դրա հետ կապված քննարկումներին, թե ինչպես կարելի է բենզին գնել պետությունից, որը սպանել է հայերի, վերլուծաբանը պատասխանում է՝ Հայաստանը գազ և բենզին է գնում այն երկրից, որի զենքով պատերազմի ժամանակ սպանել են հայ զինվորներին։ Էժան էներգակիրների նոր աղբյուրը կարևոր է, առաջին հերթին, Հայաստանի տնտեսության համար, կարծում է փորձագետը։
«Մենք պետք է ոչ միայն գնենք ադրբեջանական բենզին, այլև մեր արտադրանքը վաճառենք Ադրբեջանին»,- եզրափակում է Խուրշուդյանը։
Հարցազրույցն ամբողջությամբ՝ տեսանյութում։
Սամվել Մելիքսեթյան
