09.06.2026 | 16:21
Հայտնի է Եվրոպայի թոփ-5 լիգաներում ամենաշատ խաղաժամանակ ստացած ֆուտբոլիստը
9 մլրդ 45 մլն դրամ՝ աշխատավարձերի, 1.13 միլիարդ դրամ՝ պարգևավճարների համար․ ավագանին հաստատեց 2026-ի բյուջեն
Տնտեսություն
23.12.2025 | 18:47
Երևանի ավագանին այսօր հաստատեց 2026 թվականի բյուջեն։ Ըստ այդմ՝ մայրաքաղաքի հաջորդ տարվա բյուջեի եկամուտները կկազմեն 151 մլրդ 455 մլն դրամ, իսկ ծախսերը՝ 156 մլրդ 777 մլն 815 հազար դրամ։ Բյուջեն նախատեսված է 5 մլրդ 322 մլն 810 հազար դրամ պակասուրդով։
Factor TV-ն ուսումնասիրել է Երևանի 2026 թվականի բյուջեի ծախսերի կանխատեսման փաստաթուղթը, մասնավորապես, կառավարման մարմնի պահպանում ծրագրի ծախսերը և պարզել, որ աշխատավարձերի ֆոնդը նախատեսվում է 9 միլիարդ 45 միլիոն դրամ, որը հաշվարկված է գործող հաստիքացուցակի հիման վրա։ Ինչպես նախորդ տարիներին, այնպես էլ 2026-ին աշխատավարձերը նախատեսվում են 13 ամսվա չափով՝ ներառելով հավելավճարները, արձակուրդայինները և վերջնահաշվարկները։
Պարգևատրման ֆոնդի համար նախատեսված է մոտ 1.13 միլիարդ դրամ, որը հաշվարկվել է աշխատավարձերի ընդհանուր ֆոնդի շուրջ 12.5%-ի չափով։
Ապահովագրական ծախսերը ծրագրվել են 41.3 միլիոն դրամի չափով՝ հաշվի առնելով քաղաքապետարանի հաշվեկշռում գտնվող ավտոմեքենաների քանակը և գործող օրենսդրական պահանջները։ Նախատեսվում է նաև ԿԱՍԿՈ ապահովագրություն Երևանի քաղաքապետարանի հաշվեկշռում գտնվող 53 էլեկտրական մեքենաների համար։
Ներքին գործուղումների համար նախատեսվել է 7.1 միլիոն դրամ, որը նախատեսվում է օգտագործել ՀՀ ներսում գործուղումների և սահմանամերձ մարզեր այցերի համար՝ համատեղ ծրագրերի զարգացման նպատակով։
Արտասահմանյան գործուղումների համար հիմք են ընդունվել նախորդ տարիների փաստացի ծախսերը, 2026 թվականին ծրագրված քանակական ցուցանիշները և նախատեսվել է 59 միլիոն դրամ։
Աշխատակազմի մասնագիտական զարգացման ծառայությունների համար 2026 թվականին նախատեսվել է 26 միլիոն դրամ, որը նախատեսված է համայնքային ծառայողների և նեղ մասնագիտական ոլորտի աշխատակիցների վերապատրաստման գործընթացի ապահովման համար՝ համարժեք 2025 թվականի հաստատված ցուցանիշին։
Արփի Հակոբյան
