Ռուսաստանը կարող է հարձակվել ՆԱՏՕ-ի վրա Ուկրաինայի հետ պատերազմից հետո. Գերմանիայի ԱԳ նախարար

Ռուսաստանը կարող է հարձակվել ՆԱՏՕ-ի անդամ երկրի վրա՝ Ուկրաինայի հետ խաղաղության պայմանագիր կնքելուց հետո, հայտարարել է Գերմանիայի արտաքին գործերի նախարար Յոհան Վադեֆուլը dpa լրատվական գործակալությանը տված հարցազրույցում, գրում է DW-ի ռուսական ծառայությունը:

«Եվրոպական անվտանգությունը հնարավոր է միայն Ռուսաստանից անվտանգության դեպքում»,- ընդգծել է Վադեֆուլը:

Հետևաբար, ըստ նրա, Գերմանիան հետաքրքրված է Ուկրաինային շարունակաբար աջակցելու հարցում։

Գերմանիայի արտաքին գործերի նախարարը հրաժարվել է գնահատել այն սցենարի հավանականությունը, երբ Կրեմլը կօգտագործի Ուկրաինայում հրադադարը ՆԱՏՕ-ի տարածքին հարձակվելու համար:

«Ես միայն կարող եմ խորհուրդ տալ պատրաստ լինել նման սցենարի»,- հավելել է նա:

Գերմանիան որևէ պատճառ չունի կրճատելու իր պաշտպանական ջանքերը. Եվրոպան պետք է գործի ուժի դիրքերից Կրեմլի հետ հարաբերություններում, նշել է Յոհան Վադեֆուլը: Եթե ռուսական բանակը կայուն ռազմական հաջողությունների հասնի Ուկրաինայում, «դա լուրջ սպառնալիք կլինի ՆԱՏՕ-ի համար», զգուշացրել է գերմանացի նախարարը:

«Որքան կայուն լինի խաղաղության իրավիճակն Ուկրաինայում, և որքան շուտ Ուկրաինան կարողանա պաշտպանել իր սեփական շահերը, այնքան լավ կլինի ամբողջ Եվրոպայի համար»,- հայտարարել է Վադեֆուլը։

Գերմանիայի պաշտպանության նախարար Բորիս Պիստորիուսը նախկինում նմանատիպ գնահատական ​​էր տվել։ Նա կարծում է, որ Ռուսաստանը կարող է հարձակվել ՆԱՏՕ-ի անդամ երկրի վրա արդեն 2029 թվականին, երբ վերականգնի իր մարտական ​​կարողությունները Ուկրաինայի դեմ պատերազմում կրած կորուստներից հետո։

2025 թվականի դեկտեմբերի կեսերին Reuters-ը հաղորդել էր, որ ԱՄՆ հետախուզական ծառայությունները կարծում են՝ ՌԴ նախագահ Վլադիմիր Պուտինը ոչ միայն չի հրաժարվել ամբողջ Ուկրաինան գրավելու իր նպատակից, այլև քննարկում է այլ նախկին խորհրդային հանրապետությունների, այդ թվում՝ Բալթյան երկրների գրավման հնարավորությունը: Reuters-ի աղբյուրների համաձայն՝ ԱՄՆ հետախուզական գործակալությունների եզրակացությունները մեծ մասամբ համընկնում են եվրոպական հետախուզական գործակալությունների գնահատականների հետ։

Միաժամանակ, ԱՄՆ Ազգային հետախուզության տնօրեն Թուլսի Գաբարդը Reuters-ի հաղորդագրությունն անվանել էր «սուտ և քարոզչություն», իսկ գործակալության աղբյուրներին՝ «խորքային պետության պատերազմ հրահրողներ»։

Ռուսաստանի նախագահի հատուկ ներկայացուցիչ Կիրիլ Դմիտրիևը ՆԱՏՕ-ի երկրների վրա Ռուսաստանի հնարավոր հարձակման մասին հաղորդագրությունները որակել էր որպես «ԱՄՆ նախագահ Թրամփի խաղաղության ծրագիրը խաթարելուն ուղղված կազմակերպված լրատվական արշավ»։

Թարգմանությունը՝ Էմմա Չոբանյանի