«Նոան» կարող է Եվրոպա լիգայի ուղեգիր պարգևել Հայաստանին

Երևանի «Նոան», նվաճելով Կոնֆերենցիաների լիգայի անցումային փլեյ-օֆֆի ուղեգիր, ՈՒԵՖԱ-ի վարկանիշային աղյուսակում Հայաստանի միավորների քանակը հասցրել 3.687-ի (2.8125-ը կազմում են «Նոայի» վաստակած միավորները):

Այս պահին Հայաստանը 34-րդն է դասակարգման ցուցակում և 33-րդ տեղում գտնվող Մոլդովային զիջում է ընդամենը 0.063 միավորով։ Եթե այս մրցաշրջանում «Նոան» ավելացնի Հայաստանի միավորները, ապա 2027/2028 մրցաշրջանում հայկական մեկ թիմ Կոնֆերենցիաների լիգայի փոխարեն պայքարը կսկսի Եվրոպա լիգայից, հաղորդում է «Նոայի» մամուլի ծառայությունը։

Միայն վերջին երկու մրցաշրջանների հաշվարկում Հայաստանը «Նոայի» գրանցած հաջողությունների շնորհիվ զբաղեցնում է 27-րդ տեղը։

Հիշեցնենք, որ Կոնֆերենցիաների լիգայում «Նոան» հաղթել էր խորվաթական «Ռիեկային» (1։0) ու լեհական «Լեգիային» (1։0), ոչ-ոքի խաղացել ռումինական «Ունիվերսիտատեա Կրայովայի» (1։1) ու շոտլանդական «Աբերդինի» (1։1) հետ և պարտվել Չեխիայի գավաթակիր «Սիգմային» (1։2) ու Ուկրաինայի չեմպիոն Կիևի «Դինամոյին» (0։2)՝ Լիգայի փուլում գրավելով 19-րդ տեղը։

Անցումային փլեյ-օֆֆում Հայաստանի չեմպիոնի մրցակիցը լինելու է կամ սլովենական «Ցելյեն», կամ հոլանդական «Ազ Ալկմարը»։ 1/8 եզրափակիչ դուրս գալու դեպքում երևանյան ակումբը խաղալու է կամ Աթենքի ԱԵԿ-ի (Հունաստան), կամ Պրահայի «Սպարտայի» (Չեխիա) հետ։ Կոնֆերենցիաների լիգայի փլեյ-օֆֆի վիճակահանությունը կկայանա հունվարի 16-ին։

Լուսանկարը՝ «Նոայի» մամուլի ծառայության։