Թրամփը հայտարարել է իր անունը կրող ռազմանավերի կառուցման մասին

ԱՄՆ նախագահ Դոնալդ Թրամփը հայտարարել է ռազմածովային ուժերի համար երկու նոր՝ «Թրամփ» անունը կրող ռազմանավեր կառուցելու ծրագրերի մասին։ DW-ի ռուսական ծառայության փոխանցմամբ՝ նա այս մասին հայտնել է Ֆլորիդայում կայացած մամուլի ասուլիսում, որին ներկա են եղել Պենտագոնի քարտուղար Փիթ Հեգսեթը, պետքարտուղար Մարկո Ռուբիոն և ԱՄՆ ռազմածովային ուժերի նախարար Ջոն Ֆելանը։

30-40,000 տոննա քաշ ունեցող այս նավերը հագեցած կլինեն առաջադեմ զենքերով, այդ թվում՝ գերձայնային հրթիռներով, էլեկտրական ռելսային թնդանոթներով և հզոր լազերային համակարգերով, ինչպես նաև միջուկային մարտագլխիկներով ծովային արձակման թևավոր հրթիռներով, որոնք ներկայումս մշակման փուլում են։ Նոր նավերը կլինեն «հարյուր անգամ ավելի հզոր, քան երբևէ կառուցված որևէ այլ ռազմանավ», և կդառնան «ամերիկյան ռազմածովային ուժերի դրոշակակիրները», հայտարարել է ԱՄՆ նախագահը։

Այսպիսով, ըստ AFP գործակալության, «Թրամփ» ռազմանավերը զգալիորեն ավելի մեծ կլինեն, քան ԱՄՆ ռազմածովային ուժերի կողմից ներկայումս սպառազինության մեջ գտնվող ականակիրներն ու հածանավերը, բայց ավելի փոքր, քան Այովա դասի մարտանավերը, որոնք ծառայել են մինչև 1990-ական թվականները։

Ըստ Դոնալդ Թրամփի՝ նոր դասի առաջին երկու ռազմանավերի կառուցումը կտևի շուրջ 2,5 տարի, որի ընթացքում ԱՄՆ ռազմածովային ուժերում նավերի թիվը, ի վերջո, կաճի մինչև 10, իսկ հետո՝ մինչև 20-25։

ԱՄՆ ռազմածովային ուժերի համար նոր ռազմանավերի ստեղծման մասին Թրամփի հայտարարությունը տեղի է ունենում  ԱՄՆ-ի և Չինաստանի միջև ռազմավարական լարվածության ֆոնին: Վերջին տարիներին Չինաստանը զգալիորեն ամրապնդել է իր ռազմածովային ուժերը և վերջերս շահագործման է հանձնել իր երրորդ ավիակիրը։

Չնայած դրան՝ ԱՄՆ նախագահը շեշտել է, որ նոր ռազմանավերը չեն կառուցվում Պեկինին հակազդելու համար:

«Սա ցանկացած մեկին հակազդելու համար է, ոչ թե Չինաստանին, մենք հիանալի հարաբերություններ ունենք Չինաստանի հետ։ Ես հիանալի հարաբերություններ ունեմ նախագահ Սիի հետ, և դա Չինաստանը չէ: Դա ցանկացած մեկն է, դուք չգիտեք, թե ում հետ եք բախվելու, բայց մենք ուզում ենք խաղաղություն ուժի միջոցով»,- ասել է Թրամփը։

Fox News-ի տվյալներով՝ ԱՄՆ ռազմածովային ուժերը ներկայում ունեն շուրջ 294 ռազմանավ։ Համեմատության համար, Պենտագոնի տվյալներով՝ Չինաստանի Ժողովրդական ազատագրական նավատորմն ունի 370 նավ։