12.01.2026 | 19:14
Ձգումներ պտտաձողի վրա և վազք 100 մ վարժաձևերից. մեկնարկել է ԶՈՒ սպայական կազմերի ատեստավորման գործընթացը
Սիրիան և քրդերի գլխավորած SDF-ը համաձայնության են եկել ապաէսկալացիայի շուրջ
Քաղաքականություն
23.12.2025 | 12:39
Սիրիայի կառավարական ուժերը և քրդերի գլխավորած «Սիրիայի դեմոկրատական ուժերը»՝ SDF-ը, երկուշաբթի երեկոյան համաձայնության են եկել Հալեպ քաղաքի հյուսիսային հատվածում ապաէսկալացիայի շուրջ՝ այն բանից հետո, երբ երկու կողմերն էլ միմյանց մեղադրել են հարձակումների մեջ, որի պատճառով զոհվել է առնվազն երկու քաղաքացիական անձ, իսկ մի քանիսը՝ վիրավորվել, գրում է France 24-ը։
Սիրիայի պետական SANA գործակալությունը, հղում անելով երկրի Պաշտպանության նախարարությանը, հայտնել է, որ բանակի գլխավոր հրամանատարությունը հրաման է տվել դադարեցնել SDF-ի կրակի աղբյուրների վրա հարձակումները։ Ավելի ուշ «Սիրիայի դեմոկրատական ուժերը» հայտարարության մեջ նշել են, որ լարվածության թուլացման վերաբերյալ շփումներից հետո հրահանգներ են տվել դադարեցնել սիրիական կառավարական ուժերի հարձակումներին արձագանքելը։
Սիրիայի առողջապահության նախարարությունը հայտնել է, որ քաղաքի բնակելի թաղամասերի վրա SDF-ի հրետակոծության հետևանքով երկու մարդ զոհվել է, մի քանիսը՝ վիրավորվել։ Վիրավորների թվում են երկու երեխա և քաղաքացիական պաշտպանության երկու աշխատակից։
Բռնությունները բռնկվել են մի քանի ժամ անց այն բանից հետո, երբ Թուրքիայի արտգործնախարար Հաքան Ֆիդանը Դամասկոս կատարած այցի ժամանակ հայտարարել է, որ SDF-ը, կարծես, մտադիր չէ կատարել տարեվերջին համաձայնեցված ժամկետում պետության զինված ուժերին ինտեգրվելու պարտավորությունը։
Թուրքիան ԱՄՆ-ի կողմից աջակցվող SDF-ը, որը վերահսկում է Սիրիայի հյուսիս-արևելքի որոշ հատվածներ, համարում է ահաբեկչական կազմակերպություն և զգուշացրել է ռազմական գործողությունների մասին, եթե խմբավորումը չպահպանի համաձայնագիրը։
SANA-ն, հղում անելով պաշտպանության նախարարությանը, ավելի վաղ հաղորդել էր, որ SDF-ն անսպասելի հարձակում է սկսել Հալեպի Շեյխ Մաքսուդ և Աշրաֆիյա թաղամասերում անվտանգության ուժերի և բանակի վրա, որի հետևանքով կան վիրավորներ։ SDF-ն հերքել է սա և հայտարարել, որ հարձակումն իրականացրել են Սիրիայի կառավարությանը կից խմբավորումները։ Նշվում է, որ այդ խմբավորումները տանկեր և հրետանի են օգտագործել քաղաքի բնակելի թաղամասերի դեմ։
Սիրիայի Պաշտպանության նախարարությունը հերքել է SDF-ի հայտարարությունները՝ շեշտելով, որ բանակն արձագանքում է քրդական ուժերի կրակի աղբյուրներին։
«Մենք լսում ենք հրետանու և ականանետերի արկերի ձայներ, Հալեպի մեծ մասում կա բանակի ներկայություն»,- ավելի վաղ Reuters-ին ասել էր Հալեպից ականատեսը։
Մեկ այլ աղբյուր էլ նշել է, որ հարվածների ձայնը շատ ուժեղ է եղել և իրավիճակը բնութագրել է որպես «սարսափելի»։
Հալեպի նահանգապետը երեքշաբթի հայտարարել էր բոլոր դպրոցներում և համալսարաններում դասերի, ինչպես նաև քաղաքի կենտրոնում գտնվող կառավարական գրասենյակներում աշխատանքի ժամանակավոր դադարեցման մասին։
Թարգմանությունը՝ Էմմա Չոբանյանի
