Ադրբեջանում «Զանգեզուրի միջանցքի» շինարարությունը շարունակվում է արագացված տեմպերով. Ալի Ասադով

Ադրբեջանում «Զանգեզուրի միջանցքի» շինարարությունը շարունակվում է արագացված տեմպերով։ Ըստ ադրբեջանական լրատվամիջոցների՝ այս մասին հայտարարել է Ադրբեջանի վարչապետ Ալի Ասադովը Թուրքիայի հետ տնտեսական համագործակցության միջկառավարական համատեղ հանձնաժողովի 12-րդ նիստում։

Ասադովը նշել է, որ սկզբնական շրջանում 15 միլիոն տոննա բեռնատարողունակությամբ այս երկաթուղին կդառնա Միջին միջանցքի գլխավոր զարկերակը։

«Ուրախալի է նշել, որ Կարս-Նախիջևան երկաթուղու հիմքը դրվել է օգոստոսին։ Այս երկաթուղին Զանգեզուրի միջանցքի մի մասն է։ Երթուղին կծառայի ինչպես Ադրբեջանին և Թուրքիային, այնպես էլ այլ երկրների»,- ասել է նա։

Թուրքիայի փոխնախագահ Ջևդեթ Յըլմազը, իր հերթին, ասել է, որ անհրաժեշտ է հնարավորինս շուտ իրականացնել Նախիջևանի միջով անցնող էներգետիկ միջանցքը և ամրապնդել երկու երկրների էներգետիկ միությունը։ Նա նշել է, որ Բաքու-Թբիլիսի-Ջեյհան նավթատարի և Բաքու-Թբիլիսի-Էրզրում գազատարի նախագծերում Ադրբեջանի և Թուրքիայի կողմից դրված հիմքը դարձել է Եվրոպայի էներգետիկ անվտանգության երաշխիք՝ շնորհիվ TANAP-ի։

«Այնուամենայնիվ, մեր տեսլականը չի կարող սահմանափակվել նավթի և գազի խողովակաշարերով փոխադրմամբ։ Մենք Կասպից ծովի ռեսուրսներն Արևմուտք մատակարարող տարանցիկ երկիր չենք. մենք ռազմավարական հանգույցներ ենք, որտեղ կառավարվում է էներգիան և ապահովվում է էներգետիկ անվտանգությունը։ Այս առումով մեր էներգետիկ համագործակցությունը պետք է դիվերսիֆիկացվի՝ ներառելով նաև վերականգնվող էներգիայի աղբյուրները։ Աչքերը հառված են Միջին միջանցքին, որն անցնում է Կասպից ծովով։ Սակայն այս ներուժը լոգիստիկ հնարավորության վերածելը մեր ձեռքերում է։ Այսպիսով, կդրվեն ժամանակակից Մետաքսի ճանապարհի հիմքերը։ Չինական Մեծ պարսպից դեպի Եվրոպա առևտրի ճակատագիրը կձևավորվի Թուրքիայի և Ադրբեջանի միջև անսասան դաշինքով»,- նշել է նա։

Հիշեցնենք, որ Վաշինգտոնում օգոստոսի 8-ին ստորագրված համաձայնագրերով որևէ «Զանգեզուրի միջանցքի» մասին խոսք չկա։ Դրանցում նշվում է «Թրամփի երթուղու» (TRIPP) մասին, սակայն Բաքվի քարոզչամեքենան ու ադրբեջանցի պաշտոնյաները, Ադրբեջանի հետ կապված գործիչները շարունակում են «միջանցք» եզրույթն օգտագործել՝ խեղաթյուրելով նաև ստորագրված փաստաթղթերի բովանդակությունը ու այդ թեմայով միջոցառումներ կազմակերպել։

Թարգմանությունը՝ Էմմա Չոբանյանի