Քաղաքականություն
22.12.2025 | 12:07
Թուրքիայի Ազգային Մեծ ժողովում միջադեպ է տեղի ունեցել։ DW-ի թուրքական ծառայության հաղորդմամբ՝ 2026 թվականի բյուջեի քննարկումների ժամանակ իշխող «Արդարություն և զարգացում» և գլխավոր ընդդիմադիր Ժողովրդահանրապետական կուսակցության (CHP) պատգամավորների միջև բանավեճը վերածվել է ծեծկռտուքի։
Բուրսայից ԱԶԿ-ի պատգամավոր Մուստաֆա Վարանկն իր ելույթում ասել է, թե ԱԶԿ-ի իշխանության օրոք Թուրքիան տիեզերքում մրցակցություն է սկսել, միջոցներ են ձեռնարկվել ատոմակայաններ կառուցելու համար, առաջընթաց են գրանցել ռազմական արդյունաբերության մեջ։
Անդրադառնալով Ժողովրդահանրապետական կուսակցության առաջնորդ Օզգյուր Օզելին, որն այդ պահին դահլիճում չի եղել, Վարանկը հայտարարել է. «Նա չպետք է այդքան վախենա ինձնից։ Թող գա և լսի»։
Սա առաջացրել է Ժողովրդահանրապետական կուսակցության խմբակցության արձագանքը։ Վարանկի ելույթից հետո նիստը 10 րոպեով ընդհատվել է՝ CHP-ի և ԱԶԿ-ի միջև բանավեճերի թեժացման պատճառով: Դահլիճ վերադարձած Օզելին CHP խմբակցության անդամները դիմավորել են ծափահարություններով:
Արձագանքելով Վարանկի դիտողություններին՝ CHP-ի խորհրդարանական խմբակցությանի նախագահ Գյոքհան Գյունայդընը հայտարարել է, թե խորհրդարանում ելույթ ունեցող ԱԶԿ-ի պատգամավորները չեն մտահոգվում քաղաքացիների խնդիրներով և ոչինչ չգիտեն՝, բացի բանավեճերից։
«Հետաքրքիրն այն է, որ մենք լսեցինք երեք պատգամավորական խմբի ղեկավարների և մեկ պատգամավորի այն քաղաքական կուսակցությունից, որը 23 տարի շարունակ պարծենում է բյուջեներ կազմելով։ Դուք ոչինչ չարեցիք՝ բացի բանավեճից։ Դուք չհիշատակեցիք նվազագույն աշխատավարձը, չհիշատակեցիք թոշակառուներին։ Դուք վաճառեցիք պետական ձեռնարկությունները, որոնք պետությունը կառուցել է ամենադժվար ժամանակներում, ընդամենը 65 միլիարդ դոլարով, որը համարժեք է այս տարվա բյուջեի 2 տրիլիոն 740 միլիարդ լիրայի տոկոսավճարներին»,- հայտարարել է ընդդիմադիր պատգամավորը։
Գյունայդընի ելույթի ժամանակ ԱԶԿ-ի և CHP-ի պատգամավորների միջև սկսված բանավեճը վերածվել է ծեծկռտուքի։ Խորհրդարանի նախագահ Նուման Քուրթուլմուշը դադարեցրել է նիստը։ Ընդմիջումից հետո քննարկումներն ավարտվել են քվեարկությամբ։
Թարգմանությունը՝ Էմմա Չոբանյանի
