30.10.2026 | 16:48
Մխիթար Խաչիկյանը Նոյեմբերյանում ՔՊ-ի համայնքապետի թեկնածուն է
Ուկրաինական ԱԹՍ-ները հարձակվել են Կրասնոդարի երկրամասի վրա. վնասվել են խողովակաշար, երկու նավամատույց, երկու նավ
Քաղաքականություն
22.12.2025 | 13:54
Ուկրաինական անօդաչու թռչող սարքերը դեկտեմբերի լույս 22-ի գիշերը հարձակվել են Կրասնոդարի երկրամասի Տեմրյուկի շրջանի Վոլնա գյուղի վրա, հայտնել է տարածաշրջանային օպերատիվ շտաբը, գրում է Meduza-ն։
Հարվածի հետևանքով վնասվել են երկու նավամատույց և երկու նավ։ Նավերի վրա գտնվողները տարհանվել են։ Օպերատիվ շտաբի տվյալներով՝ անձնակազմի կամ ափին գտնվող աշխատակիցների շրջանում վիրավորներ չկան։ Նավահանգստում բռնկված հրդեհների մակերեսը մինչև 1500 քառակուսի մետր է կազմել։
«Հրդեհաշիջման աշխատանքներ են ընթանում։ Դեպքի վայրում աշխատում են արտակարգ և հատուկ ծառայությունները», – ասվում է շտաբի հայտարարության մեջ։
Դեկտեմբերի 21-ի երեկոյան օպերատիվ շտաբը հայտնել է նաև, որ անօդաչու թռչող սարքի բեկորները վնասել են Վոլնա գյուղի տերմինալներից մեկի խողովակաշարը։ Հրդեհն ընդգրկել է 100 քառակուսի մետր տարածք, տուժածներ չկան։ Թամանի ծովային նավահանգիստը գտնվում է Վոլնա գյուղում: Այնտեղ գործում են նավթամթերքի, հեղուկացված նավթային գազի, ամոնիակի և այլ ապրանքների փոխադրման տերմինալներ։
Ռուսաստանի պաշտպանության նախարարությունը հայտնել է, որ գիշերը ՀՕՊ ուժերը ՌԴ շրջանների վրա որսացել և ոչնչացրել են ուկրաինական 41 անօդաչու թռչող սարք, այդ թվում՝ Կրասնոդարի երկրամասի վրա երեք անօդաչու թռչող սարք։
Թարգմանությունը՝ Էմմա Չոբանյանի
