29.07.2026 | 00:56
«Արարատ-Արմենիան» դուրս եկավ Չեմպիոնների լիգայի որակավորման երրորդ փուլ. ՏԵՍԱՆՅՈՒԹ
Թրամփը հետ է կանչել շուրջ 30 երկրի դիվանագետի. կադրային փոփոխությունները վերաբերում են նաև Հայաստանին․ The Guardian
Քաղաքականություն
22.12.2025 | 10:14
Թրամփի վարչակազմը հետ է կանչում մոտ 30 դիվանագետի` դեսպանի և դեսպանատներում այլ բարձրաստիճան պաշտոններից, քանի որ փորձում է վերաձևավորել ԱՄՆ դիվանագիտական դիրքորոշումը արտասահմանում՝ այնպիսի անձնակազմով, որը լիովին աջակցում է Դոնալդ Թրամփի «Ամերիկան առաջին հերթին» առաջնահերթություններին, գրում է The Guardian-ը։
Նվազագույնը 29 երկրներում առաքելության ղեկավարներին անցյալ շաբաթ տեղեկացրել են, որ իրենց պաշտոնավարման ժամկետը կավարտվի հունվարին, ըստ Պետդեպարտամենտի երկու պաշտոնյաների, որոնք խոսել են անանունության պայմանով՝ քննարկելու ներքին անձնակազմի տեղափոխությունները։
Նրանք բոլորը ստանձնել էին իրենց պաշտոնները Բայդենի վարչակազմում, բայց մնացել էին Թրամփի երկրորդ ժամկետի առաջին ամիսներին տեղի ունեցած նախնական զտումների ժամանակ։ Չորեքշաբթի օրվանից նրանք սկսել են ծանուցումներ ստանալ Վաշինգտոնի պաշտոնյաներից իրենց մոտալուտ հեռանալու մասին։
Դեսպանները պաշտոնավարում են նախագահի հայեցողությամբ, չնայած նրանք սովորաբար մնում են իրենց պաշտոններում երեքից չորս տարի։ Պաշտոնյաները նշել են, որ վերադասավորումներից տուժածները չեն կորցնում իրենց աշխատանքը արտաքին ծառայությունում, կվերադառնան Վաշինգտոն այլ պաշտոններ զբաղեցնելու համար, եթե ցանկանան ստանձնել դրանք։
Պետդեպարտամենտը հրաժարվել է մեկնաբանել կոնկրետ թվերի կամ տուժած դեսպանների վերաբերյալ, սակայն պաշտպանել է փոփոխությունները, դրանք անվանելով «ցանկացած վարչակազմի ստանդարտ գործընթաց»։ Նշվել է, որ դեսպանը «նախագահի անձնական ներկայացուցիչն է, և նախագահի իրավունքն է ապահովել, որ այդ երկրներում ունենա անհատներ, որոնք առաջ են մղում «Ամերիկան առաջին հերթին» օրակարգը։
Որոշումն ամենաշատն ազդել է Աֆրիկայի վրա, որտեղ դեսպաններ են հեռացվել 13 երկրներից՝ Բուրունդի, Կամերուն, Կաբո Վերդե, Գաբոն, Կոտ դ’Իվուար, Մադագասկար, Մավրիկիոս, Նիգեր, Նիգերիա, Ռուանդա, Սենեգալ, Սոմալի և Ուգանդա։
Երկրորդը Ասիա-խաղաղօվկիանոսյան տարածաշրջանն է, որտեղ դեսպանների փոփոխություններ են սպասվում վեց երկրներում՝ Ֆիջի, Լաոս, Մարշալյան կղզիներ, Պապուա Նոր Գվինեա, Ֆիլիպիններ և Վիետնամ։
Որոշումը կազդի Եվրոպայի չորս երկրի վրա (Հայաստան, Մակեդոնիա, Չեռնոգորիա և Սլովակիա)։ Փոփոխություններ կլինեն նաև Մերձավոր Արևելքի երկուական երկրների (Ալժիր և Եգիպտոս), Հարավային Ասիայի երկրների (Նեպալ և Շրի Լանկա) և արևմտյան կիսագնդի երկրների (Գվատեմալա և Սուրինամ) դիվանագիտական ներկայացուցչություններում:
Թարգմանությունը՝ Էմմա Չոբանյանի
