Թրամփի և Էփշթեյնի համատեղ լուսանկարը հրապարակումից մոտ մեկ օր անց անհետացել է ԱՄՆ Արդարադատության նախարարության ներկայացրած նյութերից

ԱՄՆ Արդարադատության նախարարության կայքից անհետացել են ֆինանսիստ Ջեֆրի Էփշթեյնի գործով հրապարակված նյութերից առնվազն 16-ը, գրում է Associated Press-ը։

Անհետացած փաստաթղթերի մեծ մասը լուսանկարներ են։ Դրանցից մեկում պատկերված էր ԱՄՆ նախագահ Դոնալդ Թրամփը՝ Էփշթեյնի, իր կնոջ՝ Մելանյա Թրամփի, և Էփշթեյնի օգնական Գիսլեյն Մաքսուելի հետ, որը 2022 թվականին դատապարտվել էր 20 տարվա ազատազրկման՝ անչափահասների սեռական շահագործման նպատակով վաճառքի համար։

Մյուս լուսանկարների մեծ մասում, ինչպես գրում է The New York Times-ը, երևում էր մերսման սենյակը՝ Նյու Յորքում գտնվող Էփշթեյնի առանձնատան երրորդ հարկում, որտեղ ենթադրաբար ֆինանսիստը կատարում էր իր սեռական բնույթի հանցագործությունները։

Երբ լրագրողները ուշադրություն դարձրեցին Թրամփի հետ լուսանկարի անհետացման վրա, լուսանկարը կրկին հասանելի դարձան նախարարության կայքում, սակայն միայն հղումով․ ֆայլերի ցանկում այն գտնել հնարավոր չէ։

ԱՄՆ Արդարադատության նախարարությունը դեռևս չի մեկնաբանել 16 ֆայլերի, այդ թվում՝ Թրամփի լուսանկարի անհետացումը։ Միայն հայտնել է, որ նյութերը «շարունակում են ստուգվել և խմբագրվել օրենքով նախատեսված նախազգուշական նկատառումներով»։

Էփշթեյնի գործով բոլոր նյութերը հրապարակելուն ԱՄՆ իշխանություններին պարտավորեցրել էր Կոնգրեսը։ Դրանք պետք է հրապարակված լինեին մինչև դեկտեմբերի 19-ը, սակայն այդ ժամկետին նախարարությունը հրապարակեց միայն մի մասը։ Վարչությունը դա բացատրել է նյութերի մեծ ծավալով և զոհերի պաշտպանության նպատակով անհրաժեշտ խմբագրմամբ։

Reuters-ը նշում է, որ Թրամփը, որը երկար տարիներ ընկերական հարաբերություններ ուներ Էփշթեյնի հետ, «կասկածելիորեն» գրեթե չի հիշատակվում հրապարակված նյութերում։