Սաուդյան Արաբիայում անցկացվող Իտալիայի սուպերգավաթի խաղարկության կիսաեզրափակիչում «Ինտերը» հետխաղյա 11-մետրանոցներով պարտվել է «Բոլոնիային» ու դուրս մնացել պայքարից։ Հանդիպման հիմնական ժամանակն ավարտվել է 1։1 հաշվով։ Հայաստանի հավաքականի նախկին ավագ Հենրիխ Մխիթարյանն «Ինտերի» մեկնարկային կազմում խաղացել է 71 րոպե։ Հանդիպումից հետո 36-ամյա կիսապաշտպանն ամփոփել է մրցավեճը։
«Մենք պետք է ավելի շուտ ավարտին հասցնեինք այս խաղը, իսկ երբ գործը հասնում է 11-մետրանոց հարվածաշարին, դա այլ պատմություն է։ Ամբողջ թիմը լավ խաղաց՝ բացառությամբ 11-մետրանոց հարվածաշարի։ Երկրորդ խաղակեսում մենք գերիշխում էինք ու ստեղծեցինք բազմաթիվ պահեր, և եթե դու չես իրացնում դրանք, ֆուտբոլում դրա համար պատժում են։
«Բոլոնիան» արժանիորեն է այստեղ Իտալիայի գավաթում հաղթանակից հետո։ Մենք փորձում էինք հաղթել, սակայն չստացվեց․ ֆուտբոլն այդպիսին է։ Ոչ մի արդարացում չի կարող լինել, առջևում շատ աշխատանք ունենք։
Մեզ համար ցավալի է, սա մեծ հիասթափություն է։ Սակայն մենք հասկանում ենք, թե ինչի վրա պետք է աշխատենք՝ մեր նպատակներին հասնելու համար։ Չնայած հիասթափությանը՝ պետք է մոռանալ այս խաղը և կենտրոնանալ «Ատալանտայի» դեմ հաջորդ հանդիպման վրա»,- Հենրիխ Մխիթարյանի խոսքը մեջբերում է «Ինտերի» մամուլի ծառայությունը։
Իտալիայի սուպերգավաթի եզրափակիչում «Բոլոնիայի» մրցակիցը կլինի երկրի գործող չեմպիոն «Նապոլին», որը կիսաեզրափակիչում 2:0 հաշվով հաղթել էր «Միլանին»։
