28.04.2026 | 15:37
Ժամանակավորապես կարգելվի Հանրապետության հրապարակի շրջանաձև երթևեկությունը
«Չեկիստի օրվա» առթիվ ԱԱԾ-ի դիմաց լյուստրացիայի պահանջով ակցիայի կազմակերպչին բերման են ենթարկել. ՏԵՍԱՆՅՈՒԹ
Քաղաքականություն
20.12.2025 | 14:55
Դեկտեմբերի 20-ին արվեստագետ Կարեն Քյուփելյանն ակցիա է իրականացրել ՀՀ ԱԱԾ-ի դիմաց։ Այսօր Ռուսաստանի ԱԴԾ-ի (ФСБ) մասնագիտական օրն է, այլ կերպ ասած՝ «Չեկիստի օրը»։ Արվեստագետն իր ակցիայով անհրաժեշտ է համարել լյուստրացիայի իրականացումը։
Կարեն Քյուփելյանն ԱԱԾ-ի գլխավոր մասնաշենքի դռների դիմաց փռեց ռուսական հատուկ ծառայության դրոշը, իսկ դրանց կողքին դրեց «լյուստրացիա» գրությամբ դիմակներ ու ԽՍՀՄ հատուկ ծառայության հիմնադիր Ֆելիքս Ձերժինսկու լուսանկարը՝ աղբի համար նախատեսված տոպրակով։
Ակցիան փորձեցին խոչընդոտել ՀՀ ԱԱԾ ծառայողները՝ նշելով, որ չի կարելի ԱԱԾ-ի դիմաց ակցիա անել։ Ծառայողներից մեկը նաև խոչընդոտեց Factor.am-ի լրագրողի աշխատանքը՝ նախ առաջարկում էր, որ չտեսանկարահանենք, նկարածը ջնջենք, ապա փորձ արեց հեռախոսը վերցնել լրագրողի ձեռքից, սակայն նրան չհաջողվեց։
ԱԱԾ-ի դիմաց տեղադրված առարկաները մի քանի րոպե մնալուց հետո պարեկային ծառայողների կողմից հավաքվեցին։
Ակցիայից հետո կազմակերպիչ Կարեն Քյուփելյանին ոստիկանությունը բերման է ենթարկել։ Այս տեղեկությունը Factor.am-ին փոխանցեց Կարեն Քյուփելյանը։ Նա նշեց, որ ոստիկանության կենտրոնի բաժնում է։
ՆԳՆ-ից Factor.am-ին հայտնեցին, որ ակցիայից հետո երկու անձ ներկայացվել է համայնքային ոստիկանության կենտրոնական բաժին։ Ըստ ՆԳՆ-ի՝ նրանք չեն կատարել ոստիկանների օրինական պահանջը։
Նշենք, որ 2024 թվականից ՀՀ կառավարության որոշմամբ ՀՀ ԱԱԾ ծառայողի օրն այլևս չի նշվում դեկտեմբերի 20-ին։ ՀՀ ԱԱԾ աշխատակցի օրը հունվարի 8-ն է։
Նարեկ Կիրակոսյան
