Հայաստանը Ժնևում քննարկել է փախստականների խնդիրների հասցեագրման իր մոտեցումները

2025 թվականի դեկտեմբերի 15–17-ը ՀՀ ԱԳՆ Մարդու իրավունքների և հումանիտար հարցերի վարչության պետ Կարինե Սուջայանի գլխավորած պատվիրակությունը մասնակցել է Ժնևում անցկացված Փախստականների համաշխարհային ֆորումի առաջընթացի գնահատմանը նվիրված համաժողովին։

Շվեյցարիայում ՀՀ դեսպանության փոխանցմամբ՝ ֆորումի շրջանակներում Հայաստանը հանդես է եկել որպես բանախոս մի շարք բարձրաստիճան պանելային քննարկումներում՝ ներկայացնելով ՀՀ կառավարության քայլերը փախստականների հոսքերին արդյունավետ արձագանքման, ապաստանի համակարգերի ամրապնդման, օրենսդրական բարեփոխումների և թվային գործիքների կիրառման ուղղությամբ։ Ընդգծվել է հումանիտար փուլից դեպի հումանիտար–զարգացում–խաղաղություն սահուն անցման կարևորությունը և դոնոր երկրների շարունակական ներգրավվածության անհրաժեշտությունը։

Հայկական կողմի նախաձեռնությամբ անցկացվել է նաև հարակից միջոցառում՝ «Փախստականների վերաբերյալ գլոբալ համաձայնագրի իրականացումը Հայաստանում» թեմայով, որի ընթացքում ներկայացվել են ՀՀ ստանձնած պարտավորությունները և առաջիկա տարիների առաջնահերթությունները, այդ թվում՝ ՄԱԿ ՓԳՀ-ի հետ համատեղ մշակված ազգային շրջանակը։

Այցի ընթացքում պատվիրակությունն ունեցել է նաև մի շարք երկկողմ հանդիպումներ, այդ թվում՝ ՄԱԿ Փախստականների հարցերով գերագույն հանձնակատարի գրասենյակի Եվրոպայի հարցերով տնօրեն Ֆիլիպե Լեկլերկի հետ՝ քննարկելով համագործակցության հետագա զարգացումը։