Ուկրաինան պնդում է, որ հարձակվել է Միջերկրական ծովում Ռուսաստանի «ստվերային նավատորմին» պատկանող լցանավի վրա

Ուկրաինայի անվտանգության ծառայությունը Միջերկրական ծովի չեզոք ջրերում առաջին անգամ հարվածել է Ռուսաստանի «ստվերային նավատորմին» պատկանող տանկերի։ Այս մասին РБК-Ուկրաինային հայտնել են Անվտանգության ծառայության աղբյուրները։

Աղբյուրների համաձայն՝ Ուկրաինայի տարածքից ավելի քան 2000 կիլոմետր հեռավորության վրա անցկացվել է նոր, աննախադեպ հատուկ գործողություն։ Միջերկրական ծովի չեզոք ջրերում բազմափուլ գործողությունից հետո Անվտանգության ծառայության «Ալֆա» ստորաբաժանումն անօդաչու թռչող սարքերով հարվածել է ռուսական «ստվերային նավատորմին» պատկանող QENDIL2 լցանավին։

Նշվում է, որ հատուկ գործողության պահին ռուսական նավը դատարկ էր և որևէ բեռ չէր տեղափոխում։ Հետևաբար, հարձակումը որևէ սպառնալիք չէր ներկայացնում տարածաշրջանի բնապահպանական իրավիճակի համար։

«Ռուսաստանն այս լցանավն օգտագործել է այդ պատժամիջոցները շրջանցելու և գումար վաստակելու համար, որն օգտագործվում է Ուկրաինայի դեմ պատերազմը ֆինանսավորելու համար: Հետևաբար, միջազգային իրավունքի և պատերազմի օրենքների ու սովորույթների տեսանկյունից, սա լիովին օրինական թիրախ է Թշնամին պետք է հասկանա, որ Ուկրաինան չի կանգնի և կհարձակվի նրանց վրա»,- ընդգծել է աղբյուրը:

Հաղորդվում է, որ հարձակման հետևանքով լցանավը կրիտիկական վնաս է կրել և չի կարող օգտագործվել իր նպատակային նշանակությամբ։

Սա նոյեմբերի վերջից ի վեր ուկրաինական ուժերի կողմից Ռուսաստանի «ստվերային նավատորմին» պատկանող լցանավերին հարվածելու մասին չորրորդ հաղորդագրությունն է։

Այսօր մամուլի ասուլիսի ժամանակ ՌԴ նախագահ Վլադիմիր Պուտինին հաղորդավարը հարցրել է Միջերկրական ծովի չեզոք ջրերում լցանավի վրա հարձակման մասին։ Ի պատասխան՝ Պուտինը նշել է, որ վնասը կրիտիկական չի համարում։

«Ի վերջո, դա չի հանգեցնի սպասվող արդյունքի: Այն չի խաթարի մատակարարումները, այլ միայն կստեղծի լրացուցիչ սպառնալիքներ: Եվ մեր կողմից պատասխան անպայման կլինի»,- ասել է ՌԴ նախագահը:

Թարգմանությունը՝ Էմմա Չոբանյանի