Ստամբուլի մոտակայքում ռուսական ԱԹՍ է կործանվել

Թուրքիայի Քոջաելիի Իզմիթ շրջանի գյուղական վայրերից մեկում հայտնաբերվել է ռուսական արտադրության Orlan-10 հետախուզական անօդաչու թռչող սարք, ինչը հետաքննություն սկսելու պատճառ է դարձել, գրում է Turkiye today-ը։

Հաղորդումների համաձայն՝ բնակիչներն անօդաչուն նկատել են գյուղական Ջուբուքլուբալա թաղամասում և տեղեկացրել համապատասխան մարմիններին։ Հաղորդումից հետո տարածք են ուղարկվել ժանդարմերիայի խմբեր։

Սա այս շաբաթվա ընթացքում Թուրքիայում անօդաչու թռչող սարքի հետ կապված երկրորդ դեպքն է՝ երկուշաբթի թուրքական F-16-ների կողմից Չանքըրիի մոտակայքում անհայտ անօդաչու թռչող սարքի խոցումից հետո։

Orlan-10-ը միջին հեռահարության, բազմաֆունկցիոնալ անօդաչու թռչող սարք է, որը մշակվել է Սանկտ Պետերբուրգի «Special Technology Center» ՍՊԸ ռուսական ընկերության կողմից: ԱԹՍ-ն Ռուսաստանի պաշտպանության նախարարության սպառազինության մեջ է 2010 թվականից։ Այն նախատեսված է տարբեր առաքելությունների համար, այդ թվում՝ օդային հետախուզություն, դիտարկում, մոնիթորինգ, որոնում և փրկարարություն, մարտական ​​պատրաստություն, էլեկտրոնային խլացում, ռադիոազդանշանների հայտնաբերում և թիրախի հետևում։

Orlan-10-ը սովորաբար տեղակայվում է երկու կամ երեք միավորանոց խմբերով, որտեղ առաջին անօդաչու թռչող սարքը հետախուզություն է իրականացնում 1-1,5 կմ բարձրության վրա, երկրորդը՝ էլեկտրոնային պատերազմ վարում, իսկ երրորդը ծառայում է որպես տրանսպոնդեր՝ հետախուզական տեղեկատվությունը փոխանցելով կառավարման կենտրոնին։

2022 թվականին Թուրքիայի Գումուշանեի Քուրթուն շրջանում սունկ հավաքող բնակիչները հայտնաբերել էին բեկորներ, որոնք հետագայում նույնականացվել են որպես ռուսական արտադրության Orlan-10 անօդաչու թռչող սարք։ Այդ միջադեպը նույնպես վերագրվել է ռուս-ուկրաինական հակամարտությանը, և ենթադրվում է, որ անօդաչուն դուրս է եկել վերահսկողությունից և հայտնվել է Թուրքիայի տարածքում։

Թարգմանությունը՝ Էմմա Չոբանյանի