18.08.2026 | 23:01
Չեմ հիշում իմ աշխատանքային պարտականություններում օրենքով ինչ էր նախատեսված. Չախոյան. ՏԵՍԱՆՅՈՒԹ
Երեք ռուս սահմանապահներ հատել են Էստոնիայի սահմանը և 20 րոպե մնացել երկրում
Քաղաքականություն
19.12.2025 | 18:11
Դեկտեմբերի 17-ի առավոտյան ռուս-էստոնական սահմանի վրա տեղադրված տեսախցիկները ֆիքսել են, թե ինչպես է ռուս սահմանապահները մոտենում Նարվա գետի Վասկնարվայի մոտ գտնվող ծովային նավամատույցին, հաղորդում է ERR-ը: Երեք զինվորներ իջել են նավից և քայլել նավամատույցով՝ հատելով սահմանային գիծը դեպի Էստոնիա և հետ ուղղությամբ: Նրանք այնտեղ մնացել են 20 րոպե՝ նախքան վերադառնալը: Այս տարածքում սահմանն անցնում է արևելյան ափով, այլ ոչ թե գետի կենտրոնով, նավամատույցն Էստոնիայի տարածքում է, գրում է The Insider-ը։
Արևելյան պրեֆեկտուրայի սահմանային բյուրոյի ղեկավար Էրիկ Պուրգելը հայտնել է, որ միջադեպին արձագանքել են մի քանի էստոնական պարեկային խմբեր։ Գերատեսչությունը մեծացրել է պարեկային ներկայությունը՝ հետագա միջադեպերին պատրաստ լինելու համար։ Գետային սահմանին ընդհանուր իրավիճակը մնում է «նորմալ»։
Հինգշաբթի՝ դեկտեմբերի 18-ին, էստոնական և ռուսական սահմանային ծառայությունների ներկայացուցիչները հանդիպում են անցկացրել, որի ժամանակ էստոնական կողմը բացատրություն է պահանջել։ Հաղորդվում է, որ չնայած խախտման տեսաապացույցների առկայությանը՝ Մոսկվան հրաժարվել է ճանաչել սահմանի անցումը։ Ռուսաստանից հանդիպմանը մասնակցել է միայն սահմանային ներկայացուցչության ղեկավարի տեղակալը։
Էստոնիայի սահմանապահ ծառայության ղեկավարի տեղակալ Վեյկո Կոմմուսաարի խոսքով՝ բանակցությունները հիշեցնում էին նախորդ խորհրդակցությունները, որոնք տեղի էին ունեցել Նարվա գետի վրա ռուսական ուժերի կողմից լողանավերի գողությանը հաջորդած միջադեպից հետո։ Ռուսաստանի ներկայացուցիչը նշել է կարևոր հարցեր քննարկելու լիազորությունների բացակայությունը, ինչը Էստոնիային դրդել է սրել հարցը։
Էստոնիայի արտաքին գործերի նախարար Մարգուս Ցահնան հայտարարել է, որ չի տեսնում երկու երկրների միջև սահմանային պայմանագիր կնքելու և վավերացնելու հնարավորություն։ Նա ընդգծել է տարածքի նկատմամբ խիստ վերահսկողություն պահպանելու և Ռուսաստանի կողմից սադրանքներին չտրվելու անհրաժեշտությունը, որը «կօգտագործի նման հնարավորությունները»։
Դեկտեմբերի 18-ին Ռուսաստանի գործերի ժամանակավոր հավատարմատարը կանչվել է Էստոնիայի արտաքին գործերի նախարարություն՝ բողոքի նոտա փոխանցելու համար։
Թարգմանությունը՝ Էմմա Չոբանյանի
