Հաղորդաշարեր
19.12.2025 | 16:18
TikTok-ի չինական սեփականատեր ByteDance-ը հայտարարել է իր ամերիկյան ստորաբաժանումը վաճառելու գործարքի մասին: Ծառայության ամերիկյան ակտիվները կփոխանցվեն ամերիկացի ներդրողներին, իսկ չինական ընկերությունը կպահպանի 19,9% բաժնեմասը, հաղորդում է CNN-ը՝ վկայակոչելով ներքին ծառայողական գրառումը։
Գործարքը պետք է ավարտվի 2026 թվականի հունվարի 22-ին, գրում է The Insider-ը։
«Մենք ներդրողների հետ համաձայնագրեր ենք կնքել ԱՄՆ-ում TikTok-ի նոր համատեղ ձեռնարկության վերաբերյալ, որը թույլ կտա ավելի քան 170 միլիոն ամերիկացիների շարունակել բացահայտել անսահմանափակ հնարավորությունների աշխարհը կենսականորեն կարևոր գլոբալ համայնքում»,- ասել է գործադիր տնօրեն Շոու Ցզու Չյուն աշխատակիցներին ուղարկված նամակում։
ԱՄՆ-ում TikTok-ը կվերահսկվի նոր համատեղ ձեռնարկության կողմից։ Դրա 50%-ը կպատկանի ներդրողների կոնսորցիումին, որը ներառում է տեխնոլոգիական Oracle ընկերությունը և Silver Lake ու MGX ներդրումային ընկերությունները։ Մնացյալ բաժնետոմսերի մի մասը կպատկանի ByteDance ներդրողների դուստր ձեռնարկություններին, 19,9%-ը կմնա ընկերությանը։
Նոր կառուցվածքը կունենա լիազորություններ «ԱՄՆ օգտատերերի տվյալների պաշտպանության, ալգորիթմների անվտանգության, բովանդակության մոդերացիայի և ծրագրային ապահովման որակի ապահովման» հարցերում։ Այն նաև պատասխանատու կլինի «հարթակի ալգորիթմների վերապատրաստման համար՝ ԱՄՆ օգտատերերի տվյալների հիման վրա՝ արտաքին միջամտության բացակայության ապահովման համար», փաստաթղթից մեջբերում է Variety-ն։
Չինաստանի հետ համաձայնագրի մասին, որը թույլ է տալիս TikTok-ին շարունակել գործունեությունն ԱՄՆ-ում, հայտարարվել էր այս տարվա սեպտեմբերի վերջին։ Սոցիալական հարթակի արգելքը պաշտոնապես ուժի մեջ է մտել ԱՄՆ-ում հունվարին, սակայն Դոնալդ Թրամփի վարչակազմը բազմիցս երկարաձգել է TikTok-ի ամերիկյան գրասենյակը վաճառելու կամ սոցցանցն ԱՄՆ-ում փակելու վերջնաժամկետը։ TikTok-ի վաճառքը պահանջող օրենքը Կոնգրեսի կողմից ընդունվել է 2024 թվականին՝ նախագահ Ջո Բայդենի վարչակազմի օրոք՝ Չինաստանի իշխանությունների կողմից ԱՄՆ օգտատերերի տվյալներին հնարավոր մուտք գործելու վերաբերյալ մտահոգությունների պատճառով։
Թարգմանությունը՝ Էմմա Չոբանյանի
