Հանուն և ընդդեմ Գարեգին Բ-ի․ ինչ է սպասվում այսօր Մայր Աթոռում․ ՏԵՍԱՆՅՈՒԹ

Այսօր Մայր Աթոռում սպասվում է հավաք ու նույն ժամին՝ ժամերգություն։ Նախ՝ երեկ Ամենայն հայոց Գարեգին 2-րդ կաթողիկոսի դեմ ընդվզած 10 եպիսկոպոսները հայտարարություն տարածեցին՝ կոչ անելով հոգևորականներին ու հավատացյալներին այսօր ժամը 17-ին հավաքվել Մայր Աթոռում։

«Եկեք և միացեք մեզ համայն հայության հոգևոր կենտրոն Մայր Աթոռ Սուրբ Էջմիածնում` Ամենայն Հայոց Կաթողիկոս Գարեգին Բ-ին ՀԱՆԳՍՏԻ ԿՈՉԵԼՈՒ ԱՐԴԱՐ ՊԱՀԱՆՋՈՎ, որն այլևս դարձել է անհետաձգելի անհրաժեշտություն։ Թող Ամենակարող Աստված օրհնի մեր համազգային առաքելությունը և իրականություն դարձնի հոգևոր սպասավորների և հավատացյալների տարիների երազանքն ու ցանկությունը»,- նշվում է հաղորդագրության մեջ։

Եվ մինչ այս հաղորդագրությունը տարածում էին իշխող ուժի համակիրները՝ իրենց հերթին կոչ անելով գնալ Մայր Աթոռ, Արագածոտնի թեմը հայտարարություն տարածեց ֆեյսբուքյան էջում։ Դեռևս դեկտեմբերի 16-ին թեմը գրել էր, որ դեկտեմբերի 18-ին ժամը 19:00-ին Բյուրականի Սուրբ Հովհաննես եկեղեցում կկատարվի միասնական ժամերգություն և միասնական աղոթք: Ընդվզած եպիսկոպոսների հայտարարությունից հետո պատարագի վայրը և ժամը փոխվեց․ «Դեկտեմբերի 18-ին ժամը 17:00-ին միասնական ժամերգությունը տեղի կունենա Մայր Աթոռ Սուրբ Էջմիածնում: Հայցում ենք ամենքիդ աղոթական ներկայությունը միասնական ժամերգությանը: Միասին աղոթենք անազատության մեջ գտնվող մեր հոգևոր հայրերի, ազատազրկված ու գերեվարված զավակների և մեր Սուրբ Եկեղեցու անսասանության համար»:

Մայր Աթոռ, սակայն, միայն հոգևորականները չէ, որ որոշել են հենց այսօր գնալ․ սկզբում «Հայաստան» խմբակցության պատգամավոր Լևոն Քոչարյանը հայտարարեց, որ հաջակցություն Հայ Առաքելական Սուրբ եկեղեցու՝ ժամը 15։30-ին լինելու է Մայր Աթոռում, հետո միացան այլ ընդդիմադիրներ։

Եվ մինչ տարբեր թևեր հանրությանը կոչ են անում ընդդեմ և հանուն Գարեգին Բ-ի այսօր լինել Մայր Աթոռում, իսկ ոստիկանությունը հորդորում է նախատեսված հավաքի ընթացքում զերծ մնալ սադրիչ և հակաիրավական գործողություններից, Մայր Աթոռի ֆեյսբուքյան էջում նոր հայտարարություն տարածվեց․ «Մայր Աթոռը զգաստության կոչ է ուղղում վտանգաշատ հավաքի նախաձեռնությունը ստանձնած Սրբազան Հայրերին։ Պետք է դրսևորել պատասխանատվություն՝ զերծ պահելու ժողովրդին աղետաբեր հուզումներից և գործել բացառապես Եկեղեցու կանոնական ընթացակարգերով։ Հարկ չկա շահարկելու ժողովրդի նվիրական զգացումները և հայտնի կեղծ օրակարգով հակառակություններ սերմանել Եկեղեցու բարեպաշտ զավակների մեջ՝ խաթարելով հայոց հոգևոր կենտրոնի խաղաղությունն ու աղոթական միջավայրը»։

Ի՞նչ կկատարվի այսօր Մայր Աթոռում, ինչպե՞ս կանցնի ժամերգությունը, ովքե՞ր ներկա կլինեն և ի՞նչ տեղի կունենա հոգևոր կենտրոնում, պարզ կդառնա ժամեր անց։ Factor TV-ն ուղիղ հեռարձակումներով կհետևի իրադարձությունների զարգացմանը։

Մանրամասները՝ տեսանյութում։

Ռոզա Վարդանյան